Prezidente Partidu CNRT ne’e hatete, PM Taur dehan atu liberta povu, maibé vizaun laiha.

“Iha koligasaun pre-eleitorál foti tiha nia ba Primeiru Ministru, ha’u ba haree fronteiras, nia dehan programa ne’e la’ós ninian, ninia partidu iha programa rasik,” dehan Xanana liu husi Kampaña Eleitorál Kandidatu Prezidente Repúblika, José Manuel Ramos Horta, iha kampu futebool, Likisa Vila, Segunda (14/03).

Xanana dehan, CNRT ajuda Taur sai Primeiru Ministru, maibé tanba kakutak laiha nune’e CNRT sai husi governu.

“Depois aitonka tiha, nia Primeiru Ministru no ka’er tan Ministru Interiór ba polísia ninian, maibé nunka ba iha ne’ebá, lakohi atende problema polísia ninian, nia kaer netik pasta ne’ebá par nia feen ba nu’udar asesora, ida ne’e mak liberta povu.”

“Mininistru balun la halo buat ida, iha ministériu balun iha asesores ualu (8), sia (9), maibé rihun $90, rihun $100, rihun $15 fulan-fulan simu, asesor barak hatama, hatama, la halo buat ida, maibé yang penting fó servisu ba ita-nia povu, ida ne’e mak liberta povu,” nia dehan.

Nia informa, atu harii partidu tenke iha programa hodi liberta nasaun no povu, maibé partidu balun moris laiha vizaun,  hakarak de’it mak  membru governu, agora realidade hatudu laiha dezenvolvimentu ida ké povu sente.

Nia mak hamosu Planu Estratéjiku Dezenvolvimentu Nasionál (PEDN) 2011-2030, iha aprovasaun, diskusaun, planu estratéjiku dezenvolvimentu nasionál, Fretilin sai tiha.

“Lakohi tanba sira laiha planu, buat ida toka tun, toka sa’e para foti de’it nia ema ba Ministru, maibé partidu ida kuandu mosu, hamriik tenke hatene nia mosu, nia hamriik atu halo saida ba nasaun no povu,” Tuir Xanana.

Nia reforsa, tenke iha vizaun partidu ida mosu sa’e ba poder tau de’it nia ema sira, hodi la kumpri buat ida, ida ne’e la’ós partidu.

“Iha partidu balun, Ama hakarak sai ministra ba jura, jura tiha sai Ministra, 50% mai iha ne’e, la’e sai kedas. Ida ne’e partidu ne’ebé mak laiha vizaun ba povu no nasaun,” nia informa.