Tuir Prezidente TLPU, Candido Alves, hatete, antes tama ba kampaña ema barak sei haree jornalista sira nia obra neebé hakerek no fó sai informasaun neebé iha kualidade no balansu.
Tanba nee, TLPU tenke garante nafatin kualidade hodi promove notisias neebé ho kualidade iha ambitu festa demokrasia ba eleisaun prezidensial tinan ne'e.
"Antes tama ba kampaña ema barak sei hare ita nia obra oinsa hakerek no ita atu fó anin liberdade oinsa, entaun jornalista tenke garante kuaidade hodi promove anin liberdade ba ita nia hare na'in no rona na'in sira no mós ba ita nia leitores sira,"dehan nia ba jornalista sira iha ambitu serimonia kongresu TLPU nian ho tema "Haburas TLPU Promove Kualidade Jornalismu" iha Delta Nova, sabadu ne'e (19/02).
Nia hatutan, save ba jornalista atu hakarek notisia neebé kualidade mak keta ses husi formula 5W+1H, nunee bele promove anin liberdade ho kualidade ba publiku.
Nunee, iha vizaun TLPU nian hatete katak, sei promove jornalista sira iha Timor-Leste ho kualidade.
Entretantu, Prezidente Republika, Fransisco Guterres Lu-Olo, dekreta ona loron kampaña neebé sei hahú iha loron 2 to'o 16 marsu no loron votasaun ba Eleisaun Prezidensial sei realiza iha 19 marsu tinan 2022.
Asistente Editor: Saturnina da Costa
