Nia dehan, nia ho ninia partidu Khunto mai ho fuan atu halo Timor-oan sira hotu sai unidu.

“Ha’u hatete ba rai ida ne’e so ha’u mak bele halakon lorosae-loromonu, laiha tan seluk, atu halibur 77, Kork, PSHT no sira seluk, tanba ha’u mai ho fuan atu hasai osan rasik hodi kontribui ba joven sira hamutuk sai familia ida,” dehan Naimori iha kampaña ba kandidatu Prezidente Repúblika, Armanda Berta, iha kampu Futebool Lautem, Sabadu (05/03).

Naimori dehan, atu hametin Unidade Nasionál presiza joven sira-nia kontribuisaun tomak hodi bele sai ajente ba páz no estabilidade.

Tan ne’e, nia fó apelu ba joven sira atu labele haree ba kor organizasaun maibé tenke hamutuk.

Iha oportunidade ne’e, Naimori jura ba foho Ramelau no Matebian atu luta ba joven sira hodi haluha pasadu no hanoin de’it ba futuru.

“Imi bele hili Armanda Berta ka see de’it sei aat nafatin kuandu joven sira la fó liman ba malu,” dehan nia.

Iha fatin hanesan, militante partidu Khunto munisipiu Lautem deklara prontu atu lori Armanda Berta sai Prezidente Repúblika.

Koordenadór Partidu Khunto Munisipiu Lautem, Deonijio Soares hatete, nia apoiu Berta tanba konsidera Berta nu’udar feto ida ne’ebé matenek, laran moos, la hatene bobar lia no fuan boot ba nia povu.

“Ita-nia kandidatu Ama Berta, nia lider supremu  Ida, inan feto Ida ne’ebé neon moos, laran moos, tanba ne’e mak ita kandidata, nia la hewai ema no la hatete aat ema seluk no la hatene bobar lia,” dehan nia.

Nia husu ba militante no simapatizante sira atu labele tauk no duvidas tanba matenek ida ne’ebé moris iha rai ne’e mak mai daudaun ona.

“Se ita mak lori ita-nia inan Armanda Berta ne’e ba Prezidente, ha’u fiar loron ida ita mós sai Prezidente hotu, ita hatene ita-nia inan entaun ita tenke loke dalan ba nia, ita mós presiza lider sira seluk mais Berta mak laiha rai ne’e sei la hakmatek. Lider hanesan ita-nia inan Armanda Berta laiha, rai ne’e sei la hakmatek,” dehan nia.