Aleinde, iha mós Munisipiu Vikeke no Postu Administrativu Maliana, Munisipiu Bobonaro.

Saida mak agora ha’u halo ona, ha’u identifika ona rai hektare rihun 3 no ha’u sei buka tan rai hektare rihun 5, nune’e ha’u sei halo investimentu, atu halo natar no to’os. Ita sei kuda batar, hare rai maran no hare natar, foremungu, forerai, foreamuk, koto no mós forekeli,”dehan nia liu husi dialogo iha Aldeia Terra Santa, Suku Madohi, Postu Dom Aleixu, Munisipiu Dili, tersa horseik (14/03).

Tanba, nia dehan, produtu sira ne’e mak iha merkadu iha no folin di’ak liu, nune’e nia iha planu atu sosa produtu lokal iha rai laran.

“Ha’u-nia planu atu sosa produtu lokal iha teritoriu laran tomak ho volume hira de’it,” haktuir nia.

Nia dehan, uluk povu kuda governu sosa, maibé povu nia sasan dodok estraga de’it, tanba seidauk iha lei, maibé agora iha ona dekretu lei ne’ebé aprova iha fulan-setembru 2021 liu ba.

Tanba ne’e, governu iha obrigasaun atu sosa produtu sira ne’e no emprezariu ida tenke iha interese atu halo investimentu ba oin.

Ho nune’e, nia dehan, sei kapasita joven sira atu bele halo investimentu iha rai ida ne’e.

Entretantu, Ermenegilda da Costa Magalhães hatete, nia iha esperansa atu hili partidu ne’ebé bele tau matan ba dezenvolvimentu feto nian.