Kandidatu ho numeru sorteiru 1 haktuir, povu labele passivu no objetu ba prosesu libertasaun. Ne’e duni, mai ita hamutuk hodi sai sujetu iha prosesu ida ne’e.

“Ha’u mai la’os hakarak sai Prezidente iha gabinete, maibé ha’u presiza Prezidente hanesan meius ida hodi bele organiza no mobiliza povu hodi sai husi terus no ki’ak,” dehan kandidatu Isabel da Costa Ferreira iha Munisipiu Aileu, (07/03).

Nia argumenta, ho meus ida ne’e maka povu bele sai husi mukit no ki’ak, nune’e labele depende de’it ba estadu no apoiu sosial, tanba bainhira povu depende de’it ba estadu no apoiu sosial, povu sei la sai husi mukit no ki’ak.

 “Ha’u hanoin Timor la merese moris ho situasaun ida ne’e, tanbá ne’e ita hotu partisipa ba ukun rasik an, liberta ita nia rai no liberta ita nia an husi terus no ki’ak depende ba ita Ida-idak nia vontade,” tenik nia.

Nia dehan, governu no estadu iha obrigasaun hodi kria kondisaun, maibé atu hasai povu husi ki’ak depende ba familia ida-idak nia esforsu, tanbá ne’e hakarak sai prezidente ida ne’ebé hakbesik liu ba povu.

Iha fatin hanesan, Koordenador ekipa susesu  ba kandidatura ho númeru sorteiu 1, Laureano Fernandez afirma, povu tenke sai sujeitu ba prosesu dezenvolvimentu, tanba hoi da ne’e maka bele hametin pás no estabilidade ba moris di’ak povu nian.

“Ita hatene katak familia hanesan lutu ki’ik-oan ida ne’ebé pressiza harmonia, tanbá ko’alia kona-bá familia husi rai ulun to’o rai ikun, desde Timor ukun an ita nia beiala sira mai ho loro hitu no dato hitu, ne’e duni presiza dezenvolvimentu ida ne’ebé di’ak,” nia hakotu.