Portavoz Kandidatura Prezidente Repúblika, António da Conceição "Kalohan" hatete, Assanami suspende ninia atividade kampaña eleitoral ba daruak nian hodi presta omenajen ba eroi sira.

"Ohin loron veteranu sira nian, tanba ne'e kandidatura ho númeru sorteiu 16 sei hala’o vizita ba Jardin dos Erois Metinaru hodi presta omenajen ba martir sira ne’ebé fakar rán mate ba rai ne'e hodi hetan independensia, ho ida ne'e loron ohin ita manifesta ita-nia solidariedade," dehan Kalohan liu husi Konferensia Imprensa, iha Kolmera, Kinta (03/03).

Iha fatin ketak, Kandidatu PR, Mariano Assanami Sabino hatete, objetivu vizita jadin erois Metinaru atu fó omenajen ba funu-nain sira ne'ebé dedika no sakrifika aan tomak ba rai ne'e hodi ohin loron ema hotu goza ukun aan ne'e.

“Ohin (horisehik), loron espesial mai ita hotu hodi fó omenajen ba martires no eroi sira ne'ebé konkista aan mate ba rai ne'e to’o hetan ukun rasik aan,” dehan nia, bainhira vizita Jardin Erois Patria.

Loron espesial veteranus ne’e espesial, tanba ne’e mai fó omenajen ba sira ne’ebé mate ona, agradese ba Nai Maromak tamba ho fiar no tulun mak fó totalidade luta ba rai doben Timor Lorosa'e, hodi hetan independensia.

Rai ida ne'e sakrifika ema barak terus hafoin hetan liberdade, tanba ne’e biar iha diferensia iha politiku, maibé tenke hamutuk hodi garantia rai ne’e nia hakmatek hodi projeta ba oin ho futuru ne'ebé nabilan.

Tuir planu, atividade kampaña eleitoral ba kandidatura PR ho númeru sorteiu 16 ba loron datoluk nian sei hala’o fila fali iha Munisípiu Manufahi.

Lere husu Misa iha Vikeke

Kandidatu PR númeru 8, Tito da Costa Cristovao ‘Lere Anan Timur’, husu misa hodi selebra loron veteranu nian, hafoin halo kampana eleitoral loron daruak iha Munisípiu Vikeke.

Hafoin remata misa Lere Anan Timur ho ekipa lori aifunan ba semiteriu Krararas hodi fo omenajen ba martires sira ne'ebé luta rai ida ne'e.

"Ha'u hanoin loron 3 fulan Marsu, loron ida ne'ebé importante ba istoria Timor-Leste nian, 3 Marsu akontesimentu iha kraik Vikeke Kraras iha maun-alin na'in 2 deklara, ne'ebé ha'u mós halo parte 3 Marsu ida ne'e hodi reorganiza fila fali ita-nia funu Libertasaun Nasional hafoin baze apoia rahun," nia konta.

Bainhira baze apoiu rahun, Lere konta, lider sira ne’ebé komanda funu mate hotu ona, Forsa sira kuaze namkari no populasaun hotu-hotu sai vitima. Tanba ida ne'e Xanana reorganiza fali funu hodi hatutan Saudozu Nicolau Lobato nia obra no sira seluk seluk ne'ebé lao hamutuk.

"Loron 3 fulan Marsu ne'ebé reorganiza fali komite sentral ne'ebé ke eleze ami na'in 9, infelismente sira na'in 8 mate hotu ona, hela ha'u mesak. Ida ne'e mak ohin loron importante ba ita-nia povu, Vikeke, ha'u, hodi mai konta istoria ba loron ida 3 Marsu iha rai Vikeke ho ha'u-nia kampaña Prezidente Republika 2022-2027," nia dehan.