Xefe Estadu Maior FALINTIL-Forsa Defeza Timor-Leste (F-FDTL), Maijor Jeneral Lere Anat Timur dehan, tama ba eleisaun Prezidensial, Partidu Politiku balun mós kandidata ninia ema no deklara sira-nia apoiu ba kandidatu Prezidente Repúblika ida.

“Ita la hatene Partidu Politiku barak ne’e nia objetivu saida? Kandidata (an ba) Preziente Republika ne’ebé barak ne’e atu halo saida? Partidu Politiku no Kandidatu Prezidente Republika sira ne’e hanesan promosaun de kareira ida, no konsidera sira ne’e balun nasionalizmu zero,” katak Lere liu husi ninia diskursu iha Sentru Konvensaun Dili, Kinta (9/2).

Aleinde ne’e, Lere fó kritika mós ba ezistensia Partidu Politiku ne’ebé to’o númeru 30.

Tuir nia, Timor-Leste nudar nasaun kiik no povu uitoan tan ne’e bainhira iha Parpol barak sei halo povu konfuzasaun.

“Ita hakrak partidu tenke iha kualidade. Labele kuantidade (barak) hodi hada’u kadeira ukun maibé laiha objetivu,” dehan Lere.

Iha oportunidade ne’e, Lere aviza mós ba militante Parpol sira atu labele envolve an iha violensia.

Nia dehan, bainhra iha tempu kampaña no eleisaun mak militante sira manggame, militar no polisia sei la tolera.