Xanana hatete, CNRT fó konfiansa ba Horta atu bele rezolve problema ne’ebé daudauk ne’e mosu.

“Partidu CNRT apoiu Ramos Horta Kandidatu ba Prezidente Repúbliku atu lere aitarak sira atu nune’e labele  sona tuun-sa’e,” dehan Xanana iha kampaña ba kandidatu númeru 14, iha Kampu Sabraka Laran, Suku Malere, Postu Administrativu Aileu Vila,  Munisipiu Aileu, Domingu (06/03).

Xanana sente kontente tebes tanba kandidatu ne’ebé CNRT foti hetan mós apoiu hhusi partidu sira seluk no movimentu lubuk ida.

“Kontente tebes imi mai hotu iha ne’e, husi fatin hotu-hotu, mai ita hamutuk hodi hili hanesan kandidatu nasionál ida, tanba kandidatura ida ne’e la’ós apoiu de’it husi partidu CNRT, maibé partidu sira seluk no movimentu sira hotu, organizasoes, tanba ne’e mak hamutuk atu kandidatura ida ne’e sai fali kandidatura nasionál ida,” dehan nia.

Iha biban ida ne’e, Xanana husu ba estrutura iha baze atu fó edukasaun sivika ba militante no apoiante sira hodi bele vota ho loloos iha tempu eleisaun tanba kandidatu PR ne’ebé barak tebes.

“Ha’u la liur hasoru malae oioin de’it, sira dehan mai ha’u, Timor luar biasa, ha’u dehan tanba sa?, Indonézia de’it 400 juta orang, kandidatu ba Prezidente Republika na’in haat ka lima, Timor 1 juta orang, (kandidatu) ba Prezidente Repúblika 16 0rang,  luar biasa,” dehan Xanana.

Tan ne’e, nia husu atu eduka militante no apoiante sira hodi bele vota didi’ak ba Horta iha eleisaun 19 Marsu ne’e.

Horta sei Rona Uluk CNRT Cs Hafoin Koalia ho Parpol Seluk

Kandidatu Prezidente Repúblika, José Munuel Ramos promete bainhira  manan iha eleisaun nia sei halo diálogu ho partidu politiku sira ne’ebé mak durante ne’e kontra nia iha kampaña eleitoral.

Horta hatete, iha 19 Marsu 2022 eleitór sira sei ba vota no iha 20 Maiu kalan Prezidente Repúblika foun sei simu podér, maibé hahú kedas husi 19 Marsu bainhira rezultadu eleisaun sai daudauk ona, Horta hahú kedas halo konsulta informal nu’udar PR eleitu.

“Konsulta informais hahú ho Prezidente CNRT ho nia Komisaun Politiku Nasionál (CPN) ho partidu ne’ebé mak tane kandidatura ida ne’e, sosiedade sivil no Igreja,” dehan Horta.

Nia hatutan, balun bele hateten ona PR eleitu la independente, maibé lae.

“Purtantu normal, ha’u tenke rona, ohin ha’u rona, loron 20 Maiu (hafoin simu pose) ha’u rona sira ne’ebé konfia ha’u par ezekuta mandatu tinan lima ne’e. Maibé la’ós sira hatete ba ha’u tanba ha’u mós fiar ida ne’e,” nia dehan.

Hafoin konsulta ho partidu ne’ebé apoiu nia, Horta hatutan, nia sei ko’alia mós ho partidu sira hotu ne’ebé mak eziste iha TL.

“Rona ohin tolok ita, ohin insulta ita, iha 2017 ha’u kandidatu an, ha’u hetan ameasa, insultus oioin mai husi partidu seluk. Tinan liu ba 2007 -2012, ha’u simu sira, ko’alia ho sira, kolabora ho sira, ha’u halo tuir buat ne’ebé ita-nia igreja, Amu Papa iha Roma hatete ba ita, paz no dame, unidade fraternidade umana, ne’e mak ha’u-nia filozifiu, ha’u-nia filozofiu la’ós radikalismu,” nia hatete.

Horta dehan, nia la’os ema ida ne’ebé reklama katak nia de’it mak hatene, nia de’it mak fundadór.

Tuir Horta, bainhira sai PR konfiansa ne’ebé nia simu husi povu mak oinsa restaura orden konstituisionál ne’ebé Prezidente Repúblika Lú Olo viola.

“Ha’u la kritika Prezidente enkuantu nu’udar ema, família, maibé ha’u hatete ‘nu’udar Xefe Estadu ita-boot viola konstituisaun’, tanba ita-nia sistema semi Prezidensiál, see mak ba Primeiru Ministru? husi partidu mais votadu ka lider aliansa parlamentár,” nia informa.

Entretantu, tuir observasaun jornalista Jornal INDEPENDENTE, prosesu kampãna eleitorál kandidatu númeru 14  iha munisípiu Aileu la’o di’ak tanba hetan seguransa masimu husi Polísia Nasionál Timor-Leste (PNTL).

Aleinde ne’e, kampaña ne’e hetan mós observasaun husi Komisaun Nasional Eleisaun (CNE), observador internasional sira ne’ebé legalizadu ona iha STAE.