Koñese Ita-nia Kandidatu Felizberto: Joven Matenek ne’ebé Kontra Korrupsaun

By Ekipa INDEPENDENTE Marsu 11, 2022 340
Kandidatu Independente ba Presidente Republika 2022-2027,Felizberto Araujó Duarte ‘Tony’ Kandidatu Independente ba Presidente Republika 2022-2027,Felizberto Araujó Duarte ‘Tony’

KARIK seidauk familiar iha públiku nia tilun bainhira temi figura joven ida, Felizberto Araujó Duarte ‘Tony’. Loos, maske nia seidauk koñesidu iha mundu politika Timor-Leste nian, maibé nia hala’o ona serbisu lubuk ida ne’ebé kontribui ba dezenvolvimentu rai ne’e no mós ba asaun kombate korrupsaun.

Iha tinan 2022, hafoin durante tinan barak nia laran akompaña prosesu politika iha Timor-Leste, Felizberto hahú hatudu an hodi kompete ba kadeira númeru dahuluk iha Timor-Leste.

Tony mosu nu’udar kandidatu joven ida ne’ebé hakarak oferese nia an hodi servi povu no nasaun Timor-Leste.

Ho matenek no esperensia ne’ebé nia iha, Tony ne’ebé domina lian Inglés, Portugés, Tétum, Indonézia no Españól, ne’e konfia katak nia bele oferese duni buat ne’ebé kandidatu Prezidente Repúblika sira seluk labele oferese.

Felizberto Araujo Duarte, moris iha Díli, iha 1 Juñu 1978, husi aman, Enfermeiru Matias Gouveia Duarte ‘Hunuk’, Responsavel Jerál Saúde, Konsellu Nasionál Rezisténsia Maubere (CNRM) husi Same, Manufahi, ne’ebé lakon iha fulan Setembru 1999, no inan Pascoela de Araujo husi Same, Manufahi.

Bainhira tama ona idade foin-sa’e, Tony mós hola parte iha luta ba libertasaun nasionál.

Iha tinan 1991, Tony hamutuk ho família subar Komandante Kay Rala Xanana Gusmão iha sira-nia uma iha area Kuluhun, Díli, ne’ebé ikus mai rezulta nia aman hetan pena prizaun liu tinan 5.

Bainhira subar Xanana, Tony mós hetan oportunidade hodi hasoru-malu ho Jornalista husi Japaun hodi halo entrevista.

Iha tinan 1995, Tony reprezenta Timor-Timur (Timor-Leste) hodi hasoru-malu ho Jenerál Fitun Lima, Suharto, Prezidente Repúblika Indonézia iha ámbitu programa Estudante Matenek husi provínsia Indonéiza hamutuk 27, mezmu iha tempu ne'eba Tony nia aman dadur hela iha komarka Bekora. 

Ho matenek ne’ebé nia iha, Tony hetan mós bolsu estudu balun hanesan bolsu estudu husi Amu Bispo Belo hodi hala’o estudu iha UNTL, bolsu estudu Australian Aid hodi hala’o estudu iha Victoria University, Australia, no bolsu Estudu Global Embaixadór hodi ba hala’o estudu iha Institutu Dezenvolvimentu Korea, Koreia Sul.

Tony mós fó kontribuisaun ba dezenvolvimentu, liu-liu asegura investimentu Heineken ho valor investimentu kuaze millaun $45 hodi investe fábrika iha Hera, Dili, Timor-Leste.

Tony mós sai nu’udar foin-sa’e ne’ebé brani, liu-liu bainhira koalia kona-ba luta hasoru korrupsaun.

Nia kontribui mós ba kombate korrupsaun bainhira hatama kazu korrupsaun hasoru eis embaisadór Timor-Leste ba Nasaun Unidus ba tribunal. Eis embaixadór ne’e hetan ona kondenasaun prizaun tinan rua fulan neen no selu fali osan estadu kuaze rihun $50.

Aleinde kazu ida ne’e, Tony mós kontinua luta hodi hatama kazu kriminal sira seluk ne’ebé envolve husi servidór estadu sira ba autoridade kompetente.

Aktu husi Tony ne’e hatudu momoos ninia komitementu ne’ebé boot tebes hodi luta halakon korrupsaun iha Timor-Leste nune’e osan estadu bele investe duni ba interese povu Timor-Leste tomak.

Nivel Edukasuan

Tony hahú nia estudu iha eskola primaria númeru 3, Dili, hafoin kontinua ba eskola Pre-sekundaria Semináriu Dom Felipe Rinaldi, Salesiano de Dom Bosco, Baukau, no kontinua ba Eskola Sekundáriu Paulos IV no Eskola Sekundáriu São José, Balide no Semináriu Balide, no kontinua ba Kelas Persiapan Atas, Eskola Sekundáriu Mertoyudan, Jogjakarta, Indonézia (Jesuitas).

Hafoin ida ne’e, nia kontinua estudu iha Universidade Nasionál Timor Timur (UNTL) ho espesializada Ingles, maibé nia la konsege remata tanba referendu iha Timor-Leste iha tinan 1999.

Hafoin Timor-Leste hetan ninia independensia, Tony mós kontinua nia estudu no konsege foti ona titlu husi area lubuk ida ne’ebé nia estudu ba hanesan; Mestradu iha Polítika Públika espesializadu iha Finanças Públikas, Polítika Sosiál, Dezenvolvimentu Rejionál no Polítika Ambientál, husi Institutu Dezenvolvimentu Koreia, Koreia Sul; Pós-Graduasaun iha Direitu Público, espesializasaun iha Konstitusionál, Administrativu no Fiskál, iha Pontifícia Universidade Católica do Rio Grande do Sul, Brasil; no Sertifikadu Graduasaun iha Jestaun Organizasionál husi Queen’s University of Belfast, Reinu Unidu, Lisensiatura iha Bankáriu no Finanseiru husi Victoria University, Austrália.

Nu’udar ema intelektual, Tony iha esperensia servisu lubuk ida hahú husi kargu Diretór iha to’o Asesor.

Tony hala’o servisu hirak hanesan; Diretór Nasionál ba Administrasaun no Finansa Autoridade Nasionál ba Agua no Saneamentu, Institutu Públiku, (ANAS, I.P.), Ministériu Obras Públikas; Responsavel ba Jestaun Informasaun Operasionál Nações Unidas - Programa Alimentar Mundial (WFP) Timor-Leste; Prezidente Ajénsia Espesializada Investimentu (AEI) Governu Timor-Leste; Asesór Sénior, Xefe Gabinete no Pontu Fokál Fórum Macau no ASEAN, Gabinete Sekretária Estadu ba Apoiu no Promosaun Setór Privadu (SEAPRI); Asesór Gabinete Sekretáriu Estadu ba Promosaun Igualdade (SEPI); Diretór Jerál Administrasaun Ministériu Negósiu Estranjeiru; Koordenadór Embaixada Timor-Leste iha Beijing, Xina; no Asistente Espesiál Ministériu Negósiu Estranjeiru no Kooperasaun, Gabinete Ministru Negósiu Estranjeiru (José Ramos Horta),

Rate this item
(0 votes)
Last modified on Sexta, 11 Marsu 2022 13:29

Independente Digital TV