“Ukun rasik-aan ita tenke ukun ita-nia aan, la’os ema mak mai ukun ita nafatin hodi fó apoiu sosial dehan ita sai husi ki’ak, maibé ida ne’e ita sei la sai husi ki’ak. Tanba ne’e, bainhira ita sai husi ki’ak depende ba familia Ida-idak nia oan matenek, atu muda nia-aan hodi muda familia no nasaun,” dehan nia, iha Postu Administrativu Zumalai, Kovalima, horisehik.

Nia hatutan, tanba ne’e tempu to’o ona liberta ema Ida-idak nia-aan hodi liberta aan husi terus no ki’ak, labele sai nafatin pasivu no objeitu ba politiku sira, tanba buat ne’ebé partidu politiku sira mai promesa sei la halo buat ida, tanba ne’e tenke muda ema idai-idak nia moris no hahalok hodi partissipa ba iha dezenvolvimentu nasaun nian.

Entaun, nia kandidata-aan mai ho hanoin ida hodi sai prezidente ne’ebé ativu, hodi hakbesik ba povu, familia, familia kbi’it laek, liuliu ba sira ne’ebé laiha lian inklui jovem sira.

Isabel sei fó oportunidade ba joven sira hotu hahú husi aldeia, suku, postu no munisipiu to’o nivel nasional, atu bele fasilita no ajuda saida mak agora daudaun sira enfrenta iha sira-nia moris.

Iha fatin hanesan, Portavós ekipa susesu kandidatu Isabel, Estevão Verdial Moniz hateten, komunidade iha postu-administrativu tenke  haree no hili prezidente ida ne’ebé hakbesik ba povu no saida mak nia bele halo ba povu iha tinan lima mai

“Kandidata Isabel mak Ida ne’ebé tanba ne’e ohin ita hatene ona nia mak baibain hakbesik ba povu, komunidade kbi’it laek sira,  tanba ne’e husu ita hotu atu apoiu total ba kandidata ho numeru sorteiu 1,” dehan nia.