Vise Prezidente Datoluk PLP, Maria Angelina Sarmento hatete, PLP seidauk iha mekanizmu ida ne’ebé kuadru sira tuur hamutuk hodi deside kona-ba kandidatu ida ne’ebé mak kompete iha eleisaun Prezidensiál.

“Kandidatu sira ne’e ida ne’ebé mak PLP sei fó apoiu? purenkuantu ami seidauk  hola desizaun ba ida ne’e, ha’u labele promuninsia iha ne’e,” dehan nia iha Parlamentu Nasionál, Tersa (08/02).

Kona-ba karik PLP apoia Isabel Ferreira ninia kandidatura, Angelina dehan, to’o agora PLP seidauk hola desizaun no  Konsellu Politika Nasionál (CPN)  PLP promunsia bebeik ona katak PLP nia kandidatu ba eleisaun prezidensiál laiha.

“Maibé kandidatu sira ne’ebé mak agora avansa ne’e kandidatu ida ne’ebé mak ba hanesan ema independente. Nia (Isabel) ba hanesan sidadaun babain iha mós direitu atu kandidatu an,” katak nia.

Molok ne’e, Isabel halo deklarasaun ba ninia kandidatura la ho partisipasaun husi nia laen no laiha mós apoiu ofisial husi PLP.

“To’o agora ha’u laiha partidu ida atu apoiu ha’u, mais hanesan sidadaun, Timoroan ne’ebé mak iha partidu sira manifesta sira-nia apoiu ba ha’u-nia kandidatura,” dehan Isabel bainhira lansa ninia kandidatu iha 31 Janeiru foin lalais.

Hatan kona-ba tanba sa PLP la fó apoiu ba ninia kandidatura, Isabel hatete, PLP iha ninia desizaun rasik.

“Ha’u hanesan kandidata independente ne’e ba partidu hotu-hotu lais PLP de’it, se partidu balun sente katak ha’u kandidata ida ké sira tau fiar, eskoila ha’u hanesan nia kandidatura atu apoiu, ha’u nakloke,” dehan PM Taur nia espoza ne’e.

Entretantu, bainhira jornalista sira husu ba PM Taur kona-ba ninia espoza kandidata an ba PR, Taur hatete de’it katak sidadaun Timor-Leste hotu-hotu iha direitu atu kandidata an.

“Ha’u hanoin ema hotu-hotu iha direitu atu ba kandidata an ba Prezidente Repúblika. Agora se vota ka lae ne’e ha’u-nia rahasia, maibé bainhira iha ona urna nia oin ha’u hatene vota ba see,” dehan PM Taur hafoin enkontru semanal ho Prezidente Repúblika, Francisco Guterres Lú Olo, iha Palasiu Prezidensiál Bairu-Pite, Kinta (03/02).

Iha fulan Janeiru nia laran, Vise Prezidente Bankada PLP, Francisco de Vasconcelhos hatete, PLP presiza konvoka enkontru alargada hodi husu opiniaun husi estrutura munisipiu sira kona-ba kandidatura PLP nian, tanba orgaun estrutura nasionál labele foti desizaun mesak.

“Tanba ne’e mak tenke liu husi enkontru alargada  no tempu badak PLP sei realiza enkontru alargada ida atu foti desizaun iha ka laiha, se karik laiha, ezerse direitu siviku hanesan sidadaun, hili ida ne’ebé mak iha ne’e,” dehan nia Vasconcelhos iha Parlamentu Nasionál, 19 Janeiru 2022.