Sinal ida ne’e hatudu bainhira Portavoz no atual Sekretariu Jerál PD, António da Conceição ‘Kalohan’ hamutuk ho Vise Sekretariu Jeral PD, Nino Pereira, ba hasoru-malu ho Horta iha gabinete eis titular José Ramos Horta nian iha Farol, Tersa (23/03) loraik.

Maske la fó komentariu kona-ba asuntu ne’ebé koalia ho Horta, maibé Kalohan hatete de’it katak sira mai hodi hahú komunikasaun ho Horta.

Molok hasoru-malu ho Horta, liu husi konferensia imprensa iha sede PD, Kalohan hatete, PD seidauk hola desizaun atu apoiu kandidatu ne’ebé avansa ba ronde daruak.

“Obsaun ne’ebé partidu atu hola ba dadaun ne’e partidu seidauk hola desizaun, tanba apuramentu seidauk final no hein pronunsiamentu husi tribunal,” deklara Kalohan.

Kona-ba kontaktu husi kandidatu ne’ebé avansa ba ronde daruak, nia hatete, to’o horseik Assanami seidauk simu kontaktu husi kandidatu seluk.

“Ha’u hanesan porta voz mós seidauk hetan kontaktu, maibé hanesan ninia lian ne’ebé ha’u hasa’e mak ida ne’e ‘respeita maioria dos votus’ ne’e mak PD nia pozisaun,” dehan nia.

Maske seidauk iha desizaun final husi tribunal ba rezultadu eleisaun, maibé nia dehan, ekipa hahú halo avaliasaun haree kona-ba vox populi vox dei, entaun indikasaun ne’ebé iha lori ona votus rihun 300 resin ba Horta manifesta saida mak Assanami ko’alia iha fatin-fatin nune’e PD sei respeita povu nia lian ne’e nafatin.

“Obsaun politika ne’ebé halo la’os tanba PD nia preferensia ba kandidatu na’in rua (2) ne’e, maibé preferensia ne’e tuir povu nia lian ne’ebé boot liu ne’e mak Maromak nia lian,” dehan nia.

Nia afirma, bainhira iha ona desizaun husi tribunal, Konsellu Superior partidu no kandidatu rasik sei tuur hamutuk hodi deside ninia pozisaun.