Governu Lori Ona Programa ba PN Featured

By Cristina Ximenes Jullu 23, 2018 2405
PM Taur Matan Ruak PM Taur Matan Ruak

DILI:Prazu ba governu foun atu aprezenta sira-nia programa ba Parlamentu Nasionál besik daudauk ona. Tan ne’e, Governu Konstitusional daualu esforsu an atu ohin, Sesta (20/07), sei lori programa ba PN.

Primeiru Ministru (PM) Taur Matan Ruak iha Kinta (19/07) hasoru-malu ho Prezidente Repúblika Francisco Guterres Lú Olo hodi informa kona-ba planu governu nian hodi aprezenta programa iha Sesta (20/07).

“Ami sei haruka Konsellu Ministru (KM), iha loron Sexta-feira (20/07), haree halo desizaun ikus, ami-nia hakarak ne’e aban (ohin) ne’e tenke ba aprezenta programa ba Parlamentu Nasionál tanba prazu ne’e 22 ne’e monu iha Domingu. Tanba ne’e ami-nia hakarak ne’e antes (prazu remata) aprezenta ona programa,” informa PM Taur hafoin enkontru ho PR Lu Olo iha palasiu prezidensial Bairru-pite, Dili.

Iha fatin ketak, Sekretariu Jeral Partidu CNRT, Francisco Kalbuadi Lay garantia katak, ohin VIII Governu ne’ebé lidera husi PM Taur hamutuk ho nia membru governu sira sei aprezenta programa iha PN.

Sekretariu Jeral CNRT ne’e dehan, VIII Governu tuir ona rekezitu Konstitusional tanba ne’e sei kumpri loron 30 hodi submete nia programa ba PN.

“Ha’u hatene katak la’os ohin entaun aban governu sei submete programa iha Parlamentu Nasional,” dehan nia iha sede CNRT, Kinta (20/07).

Rate this item
(0 votes)
Last modified on Segunda, 23 Jullu 2018 16:38

Independente Digital TV