"Ohin loron (horsehik) (20/2), ha’u anunsia ofisialmente ha’u nia kandidatura ba Prezidente Repúblika periudu 2022-2027,”deklarasaun Mariano Assanami Sabino, lihusi nia diskursu, iha Tasi-tolu, Domingu ne'e (20/02).
Assanami afirma katak, rajaun fundamentu ne’ebé motiva nia hodi kandidata-an ba Prezidente Repúblika, tanba nudar lider transjerasional no Interjerasional ida, iha responsabilidade ba estadu RDTL.
Ho motivu ne’e, bainhira ba Xefe Estadu nudar aman ba ema hotu, Assanami hakarak garante no promove prinsipiu no valor umanu Timor-Leste nian hodi kuda-metin domin, fraternidade, solidariedade, toleransia, dialogu, no responsabilidade iha ida-idak nia fuan no laran.
Nia mós hakarak halo mudansa ba mentalidade no atitude politika no sosial sira ne’ebé la kontribui ba unidade pais nian.
"Ha’u hakarak kria ambiente politika ne’ebé di’ak hodi timor-oan tomak bele partisipa di’ak liu tan iha dezenvolvimentu ida integradu, sustentavel no inkluzivu", nia dehan.
Motivu segundu, hakarak lori nia atu assegura no defende pensamentu autentiku husi fundador RDTL sira.
"Ida ne'e hanesan ha’u nia pensamentu rasik, luta hodi promove no defende povu nia moris di’ak ka bem-estar ho baze iha sistema demokratiku ida, no ho dialogu hodi hetan konsensu ba asuntu sira ho karakter interese nasional", nia relata.
Motivu terseiru, hakarak promove no hametin garantia ba sidadaun sira nia direitu no liberdade no respeitu ba dignidade umana hanesan hatu’ur ona iha Konstituisaun, ho baze iha Estadu de direitu, liu husi implementasaun konsistente ba lei sira, no dezenvolvimentu iha setór hotu-hotu.
Motivu ba daha'at, Assanami hanesan lider jerasaun ida, hakarak hametin no garante estabilidade nasional, ne’ebé hanesan kondisaun esensial ba konsolidasaun prosesu konstrusaun nasaun no konstrusaun Estadu.
Enkuantu iha pensamentu husi kandidatu ne'e mai ho vizaun rasik ba Timor-Leste, hakarak kuda no hametin liutan Timor-Leste ida fraternu, solidariu, unidu, tuir vizaun Estadu nian.
Nia dehan, Prezidente Repúblika nu'udar aman ba nasaun no aman ba povu, karik mak nia elieitu ba Prezidente Repúblika hakarak promove no hametin liu tan Timor-Leste ida fraternu, solidariu, unidu, hodi atinji sosiedade ida justu, prosperu no inkluzivu.
Tanba ne'e nia kandidatu ba PR hodi hametin hikas lasu amizade entre timor-oan sira sai nu'udar maun ho alin, feton no naan, hodi hadok tiha hanoin no hahalok sira nebe diskrimina malu, odiu malu no vinga malu.
Nune'e kandidatura ne'e mos hakarak halo timor-oan sira moris hamutuk iha solidariedade, tulun malu, no hamutuk lori Timor ba oin, Timor ida nebe lori moris di’ak hanesan ba timor-oan hotu-hotu, Ita hakarak hametin koezaun no armonia sosial hodi hari’i sosiedade Timor ida justu, prosperu no inkluzivu.
Assanami promete, bainhira eleitu ba Presidente Repúblika nia sei rezigna aan husi kargu Prezidente Partidu Demokratiku.
Tanba tuir nia katak, bainhira eleitu ba Presidente Repúblika sei la sai Presidente ida palasiu Prezidénsia, maibé sei sai Prezidente ida ba povo.
Presidente Tribunal Rekursus anunsia ona numeru sorteiu ba kandidatu Presidente Repúblika eleitu periodo tinan lima hamutuk na'in 16, iha loron 17 Fevereiru.
Kandidatura Prezidente Repúblika, Mariano Assanami Sabino ho numeru sorteiu 16.
Entrentantu Prezidente Repúblika, Fransisco Guterres Lú Olo dekreta ona loron kampaña hahú iha loron 2 to'o 16 Marsu 2022, no loron votasaun ba eleisaun prezidensiál realiza iha loron 19 fulan-Marsu tinan ne'e.