Alkatiri hatete, iha Sesta (04/03), Lere hasai lia-fuan katak Lú Olo sei la manan tanba nia ho Alkatiri nia lisan la hanesan.
"Ha'u dehan ida ne'e ba ha'u nian alin Lere Anan Timur, ha'u hein ita-boot atu kontaktu mai ha'u husu deskulpa, tanba ha'u hanoin tinan lima tan ita sei servisu hamutuk. Se ita-boot ho orgullu la husu deskulpa tinan lima lalika buka ha'u," dehan Alkatiri iha kampania ba kandidatu Prezidente Repúblika númeru 6, Francisco Guterres Lú Olo, iha kampu Fetebol Maliana, Sábadu (05/03).
Alkatiri hatete, bainhira nia koalia hatan ba deklarasaun Lere nia sente laran moras.
“Bandeira ida nia hadomi ne’e nia la hatene sai husi ne'ebé, nia hatene de'it uza bandeira ne'e maibé nia la hatene bandeira ne'e sai husi ne'ebé, sala boot,” dehan Alkatiri.
Alkatiri dehan, tempu sei naruk tan ne’e bainhira Lere hatete Lú Olo la manan tanba lisan la hanesan, nia tenke hanoin didi’ak fali lai, tanba keta loron ruma sei servisu hamutuk fali.
“Hanoin didi'ak ba atu labele ko'alia hanesan labarik, tinan lima tan keta Lere presiza fali ida lisan laiha ne'e, keta presiza fali ida lisan la hanesan ne'e. Tinan lima tan keta ita na'in rua sei hamutuk hadia rai atu kuda buat ruma, hanoin didi'ak ba, dezde ha'u koñese Lere ha'u respeita Lere, maibé ha'u la admite falta respeitu ida ne'e,” dehan nia.
Iha oportunidade ne’e, Alkatiri aseita ho konseilu husi kandidatu PR, Ramos Horta, ba Lere ne’ebé husu atu Lere fila ba Iliomar hakiak animal no haree oan ho beioan sira.
