Tuir Diretór Ezekutivu AHDMTL, Gaspar Afonso, hateten, iha eleisaun nee ema hotu tenke ezerse sira nia direitu, tuir konstituisaun RDTL artigu 47, fó autorizasaun ba sidadaun Timor-Oan hotu ho idade 17 ba leten iha direitu atu vota no mós iha direitu ba sufrajiu ezersisiu ema ida-idak nian no konstitui dever siviku ida.
“AHDMTL nia membru ne'ebé to'o ona idade 17 atu ba partisipa iha eleisaun, maibé ami nia tristi mak ami labele vota ho segredu absoluta, tanba fasilidade ka asesibilidade laiha. CNE dehan lei la bandu atu hala’o asesibilidade, maibé CNE ho STAE rasik iha razaun dehan, osamentu laiha, afinal ba asesibilidade ema ho defisiensia matan nee nia kustu ladun boot no laprezudika ba Orsamentu Jeral Estadu,” dehan nia ba Online INDEPENDENTE, iha knar fatin Manleuana, sesta (04/02).
Nunee, AHDMTL rekomenda ba Governu atu iha eleisaun tuir mai, bele kria kondisaun neebé diak ba ema ho defisiensia sira hotu, atu ezerse sira nia direitu vota ho segredua absoluta.
Tuir nia, ema ho defisiensia matan neebé dala barak ba vota, akompaña husi familia, kolega no mós observador sira. Ho ida nee sira sente la konfortavel, tanba sente direitu vota ne'e ema bele manipula.
Nia hateten, iha eleisaun prezidensial tinan nee, parte AHDMTL ho membru sira sei vota iha munisipiu Dili, tanba Governu kria ona sentru votasaun Paraleu tolu iha Munisipiu Dili.
Enkuantu, membru ema ho defisiensia neebé sei tuir eleisaun prezidensial tinan nee hamutuk na’in 60 kompostu husi feto na’in 30 no mane 30.
Ba membru sira neebé balun seidauk hetan kartaun eleitoral, agora dadauk AHDMTL prepara hela karta pedidu atu husu ba responsavel eleitor sira atu fó atendemnetu hodi halo resensiamentu eleitoral.
Entretantu, Eleisaun Prezidensial sei halao iha loron 19 fulan-Marsu tinan 2022.
Asistente Editor: Saturnina da Costa
