Vise Prezidente Ezekutivu Woodside Energy, Julie Fallon informa, enkontru ho PR Horta atu atualiza kona-ba atividade implementasaun projetu Greater Sunrise (GS) no introdús Vise Prezidente Greater Sunrise Timor-Leste, Paulo Sullivan.
“Ba futuru ami halo kolaborasaun servisu di’ak tebes entre Sunrise Joint Venture no MPRM hodi lori progresu projetu ne’e lao di’ak nafatin,” dehan Julie ba jornalista sira hafoin enkontru ho PR Horta, iha Palásiu Prezidensiál, Tersa (19/05).
Nia hatete, servisu tékniku sira durante ne’e fokus liu ba eskopuTimor-Leste Naturál Gás (TLNG) no servisu sira husi Sunrise Joint Venture katak, progresu dezenvolvimentu iha Timor-Leste bazeia ba akordu ne’ebé asina ho MPRM iha tinan kotuk, no prosesu tenderizasaun no levantamentu sulvei sira la'o di’ak tebes.
Aleinde, kona-bá fronteira tasi, nia dehan, agora negosiasaun sei la'o hela atu finaliza dokumentu esensiál tolu.
"Dokumentu hirak ne’e inklui Petroleum Mining Code’, rejime fiskál no taxa sira, no mós kontratu partilla produsaun," nia esplika.
Julie hatutan, dokumentu tolu ne’e importante tebes atu finaliza molok projetu ne’e tama ba faze tuir mai.
Entretantu, iha enkontru PR Horta demonstra interese boot ba dezenvolvimentu projetu ne’e no husu ba kompaña kona-ba tempu anúnsiu ofisiál no progresu atual implementasaun projetu GS.
Molok ne’e, Ministru Petroleu no Rekursus Minerais, Francisco da Costa Monteiro hatete, ba asuntu GS, TL ho Australia iha hela faze negosiasaun.
Tuir nia, iha dokumentus importante mak kodigu Menerai ba Petroliu, kontratu fahe produsaun no rejime fiskal ne’ebé tenke diskuti no finaliza lalais.
