Uma-kain Liu Rihun 11 Reklama Subsidiu $100 Featured

By Pedro Alves Jullu 01, 2020 2164
Benefisiariu subsidiu $200 iha situasaun Estadu Emerjensia Covid-19. Benefisiariu subsidiu $200 iha situasaun Estadu Emerjensia Covid-19.

DILI: Prosesu pagamentu subsidiu ba uma-kain sira iha munisipiu 12 remata ona. Maibé, iha uma-kain liu rihun 11 mak hato’o reklamasaun ba governu tanba sira-nia naran laiha lista pagamentu subsidiu $100.

Ministru Administrasaun Estatál (MAE) Miguel Pereira de Carvalho informa, durante prosesu pagamentu, Ministériu Solidariedade Sosiál no Inkluzaun (MSSI) rejista reklamasaun husi uma-kain liu rihun 11 ne’ebé seidauk hetan direitu ba subsídiu $100.

Ministru ne’e dehan, ekipa MSSI ne’ebé halo pagamentu simu reklamasaun sira ne’e direitamente husi uma-kain sira ne’ebé naran la tama iha lista.

Husi total kazu reklamasaun ne’e, nia hatete, MAE rejista kazu reklamasaun 1.600.

"Agora MAE rasik mós rejista pelumenus 1.600 reklamasaun, naran ne'e MAE envia ona ba iha MSSI no ida ne'e parte ida husi reklamasaun sira ne'e," dehan Miguel.

Atu halo verifikasaun ba reklamasuan hirak ne’e, ministru ne’e dehan, sira sei hein pagamentu subsídiu iha Rejiaun Administrativa Espesiál Oekusse Ambeno (RAEOA) remata.

Entretantu, tuir planu pagamentu subsidiu ba uma-kain iha RAEOA sei hahú iha 4 to'o 11 Jullu 2020.

Rate this item
(0 votes)

Independente Digital TV