Teste PCR hala’o iha kuarta (2/6), no rejultadu fó sai iha loron kinta horseik (3/6) hatudu sira na’in hat hetan positivu Covid-19. Sira na’in hat ne’e mane atu ba servisu iha area peskas.
“Tuir lolos traballador na’in 70 mak atu aranka ba Korea, maibé na’in 5 hetan positivu Covid-19. Nune’e sira na’in 65 mak agora aranka ona ba Korea,”hateten Diretór Nasioanl Exterior, Filomeno Soares iha Aeroportu Nikolau Lobato, Dili, sesta ohin.
Traballador na’in 65 fahe ba area peskas na’in 40 no pabrika na’in 25.
Tuir nia, traballador na’in lima ne’ebé positivu agora dadauk iha ona fatin Izolamentu hodi kumpri loron 14.
Tanba ne’e, traballador na’in lima ne’ebé atu tuir fali traballador sira seluk, sei haree fali sira nia rezultadu PCR no depende desizaun husi empregador sira iha Korea Sul.
Ho nune’e, Diretór husu ba traballador sira ne’ebé atu aranka ba Korea nafatin mantein sira nia kontratu no labele ses husi sistema atu nune’e labele dada risku ba an rasik.
Entretantu, traballador ho naran Baltazar de Araújo (26) hatete, hanesan sidadun Timor-Leste labele hases-an husi saida mak Governu koalia ona, katak ba ho objetivu ne’ebé iha.
Tuir nia, bainhira fila mai ho esperensia ne’ebé iha bele loke fali kampu traballu ba maluk Timoroan sira seluk, tanba joven barak mak agora dadauk dezempregu.
“Hanoin iha buat barak ne’ebé ita planu, husi formasaun no esperensia ne’ebé iha, bele fila mai loke kampu servisu ba maluk sira seluk, nune’e mós hodi muda ita nia moris no familia”,dehan nia.
Asistente Editor: Saturnina da Costa
