"Traballadór na'in 66 ne'e, hotu-hotu sei ba servisu iha área peskas nian,” dehan Diretór DNEE, Filomeno Soares, ba jornalista sira hafoin asina deklarasaun ho inan-aman sira,  iha Salaun Ótel Timor-Lodge, kinta ne’e (09/06).

Nia hatutan, SEFOPE mós asina ona deklarasaun ho família traballadór na'in 66 ne'ebé atu ba servisu iha Korea Súl.

Enkuantu, asina deklarasaun ne'e, hanesan komprimisíu ida husi família traballadór katak konkorda ona atu husik sira nia la'en, ka oan ba servisu iha Korea Súl. Atu nune’e, bainhira mosu problema ruma, parte rua iha hotu responsabilidade hodi resolve.

Ho nune’e, iha loron 13 fulan-juñu 2022, traballadór hirak ne’e sei aranka husi Timor-Leste ba deskansa iha Kuala-Lumpur, Malazía, hafoin sira sei to’o iha Korea Súl iha loron 15 fulan-juñu tinan ne’e.

Diretór ne’e mós enkoraja, traballadór sira atu aproveita uza oportunidade ne’e ho diak, tanba ida ne’e hanesan pasu diak ida atu bele hadi'a moris ba futuru.

Nune’e mós, nia afirma, traballadór sira ne’ebé ba servisu iha Korea Súl, ne'e reprezenta nasaun Timor-leste, la'os individu, tanbá ne'e tenke hatudu komportamentu di'ak , servisu labele hala'i ses husi sistema.

Aleinde, Filomeno dehan, ba familia traballadór sira iha Timor-Leste, atu nafatin reza ba sira no halo tuir kultura  atu nune'e bele fó nafatin matak malirin ba traballadór sira atu halo servisu, tanbá servisu ne'ebé sira halo iha Korea Súl todan tebes.

Entretantu, iha tinan 2009 to’o 2022, traballadór sira ne’ebé ba servisu iha Korea Súl, hatama ona reseitas ba kofre Estadu hamutuk dolar amerikanu U$43,047,509.67.

Molok ne’e, SEFOPE liu husi DNEE haruka ona traballadór hamutuk rihun 3.500 ba servisu iha Korea Súl.