Tuir Diretór Diresaun Nasional Exterior Emprego (DNEE), Filomeno Soares, hateten, politika governu nian liu husi SEFOPE, iha papel importante ida mak, nafatin esforsu atu fasilita joven timor-oan sira halo servisu iha rai liur.

“Ho ha'u nia hanoin ida katak, traballadór timor-oan sira ba rai liur la’os atu sai atan, maibé sira ba buka matenek no buka osan, depois fila mai Timor hodi investe, ne'e mak programa ida ne’ebé nafatin kontinua atu bele kontribui ba ita nia dezenvolvimentu iha nasaun," dehan nia ba Jornalista sira iha Ótel Timor-Lodge, Komoro, kinta ne’e (09/06).

Tuir nia, timor-oan sira ne’ebé ba servisu iha rai liur, hanesan iha Australia no Korea Súl, sira hetan osan barak, ida ne’e mós bele kontribui ba hadia dezenvolvimentu iha Timor-Leste.

Nune’e, nia dehan, traballadór sira barak mak halo ona mudansa ba sira nia moris uma laran nian.

Entretantu, Diretór ne’e mós, husu ba traballadór sira iha Korea Súl, ne’ebé halai ses husi sistema, atu tama fila fali ba sistema hodi kontinua halo servisu.

“Ita iha adidu no Embaixadór iha ne'ebá,  traballadór sira iha ne’ebé mak hases-aan husi sistema ne’e, bele konvense ho sira, atu nune’e bele tama fali ba sistema hodi kontinua servisu to’o hotu,”haktuir nia.

Nia akresenta, ba sira ne’ebé halai ses husi sistema, antes bainhira sira atu sai husi Timor-Leste ba servisu iha rai liur, governu liu husi SEFOPE sempre fó atensaun ba sira atu servisu iha ema nia rain ho disiplina.

Tanba hases-aan husi sistema ne'e, tau imi ba iha sinal risku, ba familia no mós ba nasaun.