Sekretáriu Estadu ba Arte no Kultura (SEAK), Jorge Soares Cristovão, hamutuk ho kuradora Loredana Pazzini-Paracciani, iha loron 27 Fevereiru 2026 foin lalais ne’e anúnsia ofisialmente títulu, tema, no fatin ba partisipasaun Timor-Leste nian iha Espozisaun Arte Internasionál da-61 husi La Biennale di Venezia.
Ho tema “Across Words/Liu Husi Liafuan”, espozisaun ne'e sei esplora oinsá dalen sai nu'udar forsa jeradora iha sistema komunikasaun Timor-Leste nian, ne'ebé harii husi tradisaun orál, ruptura istórika, no kontinuidade kulturál. Partisipasaun ne'e sei hala'o iha fatin prestijiadu Arsenale, Veneza, hahú husi loron-9 Maiu to'o loron-22 novembru 2026.
“Hanesan nasaun foin-sa’e ida, Biennale hanesan dalan ida ba ami atu fahe istória husi ami-nia kultura no aspirasaun artístiku ho mundu,” Sekretáriu Estadu, Jorge Soares Cristovão afirma liu husi Komunikadu ne’ebé Media INDEPENDENTE asesu, Sexta (06/03).
Nia mós hatutan katak pozisaun iha Arsenale sei aumenta vizibilidade ba audénsia boot liután no fasilita interkámbiu ho Paviliaun Nasionál husi nasaun seluk.
Purtantu, Paviliaun Timor-Leste nian sei aprezenta obra husi artista na'in tolu (3) ne'ebé reprezenta jerasaun no média oioin hanesan Verónica Pereira Maia, Etson Caminha no Juventino Madeira.
Enkuantu, Artista Verónica Pereira Maia (m. 1933): Sei aprezenta obra seminál Tais Don (1995), ne'ebé utiliza aprosimasaun fonétika alfabetu nian hodi hanoin hikas eventu istóriku sira.
Artista Etson Caminha (m. 1984): Sei aprezenta instalasaun lian imersiva ho títulu CUALE (Sulin), ne'ebé esplora identidade kulturál liuhusi transformasaun lian.
Artista Juventino Madeira (m. 1994): Sei aprezenta obra vídeo FRAZE NE’EBE SEIDAUK HOTU, ne'ebé funsiona hanesan odamatan sensoriál ba rai Timor-Leste.
Entretantu, ida-ne’e marka partisipasaun daruak Timor-Leste ni’an iha festivál kulturál ne'ebé tuan no prestijiadu liu iha mundu, hafoin simu estatutu membru plenu ASEAN ni’an.
