Diretór Jerál STAE, Elviro Fernandes Moniz hatete, iha 2024 Governu komesa implementa sistema biométriku ba eleitór tuan no foun iha nivél nasionál.
Nia haktuir, iha fulan setembru no outubru 2024, STAE implementa iha munisípiu sira, tuir mai fali iha 2025 halo nafatin iha iha munisipiu, maibé STAE halo pilotu ida ka halo teste ida ba iha Postu Administrativu sira, maibé ho karatér móvel.
Prosesu implementa iha Postu Administrativu, nia afirma, grasa de deus prosesu sira la’o di’ak, mesmu halo teste viável ka la’e?, implementa sistema foun ne’e ba iha Postu.
“Entaun prosesu sira ne’e, iha meiadu 2024 ate fim 2025 ita rejista ka atualiza ona purvolta 287,872 eleitores, ita ekivalénsia ho 31 pursentu, husi ita nia eleitór 900 mill ital ne’ebé iha, ita rejistu ona purvolta 287 ital, ida-ne’e ba eleitór ne’ebé atualizadu ba sistema biométriku,” afirma Diretór Jerál STAE, Elviro Fernandes Moniz, iha entrevista eskluziva iha programa “Ko’alia Sai” ho Títulu “Preparasaun Kalendariu Resensiamentu Eleitoral ba Eleisaun Kamara Munisipal no Eleisaun Prezidensial”, iha Studio II, INDEPENDENTE, Hudi Laran, Dili, Segunda (16/02).
Aliende ne’e, STAE mós halo rejistu eleitor foun ho sistema biométriku, ne’ebé komesa husi meiadu 2024, tantu hanesan eleitores ne’ebé atualiza ka renova sira-nia kartaun.
“Eleitór foun hamutuk 37 mill ne’ebé rejistu. Purtantu hau bele dehan husi totál númeru ne’ebé iha ne’e ita sei iha purvolta 69 pursentu ne’ebé ita presiza atualiza iha tinan ida ne’e. agora atualizasaun ne’e barak ita iha rai laran, tanba tinan rua ba kotuk, ita la halo iha rai li’ur, ne’ebé sira atualiza ne’e iha rai laran deit.”Nia esplika.
Maske nune’e, nia fundamenta, agora rai-li’ur, STAE planu halo iha tinan ne’e, maibé em-jerál prosesu implementasaun sistema biométriku iha rai-laran la’o diak.
“Mesmu ita foin hahu prosesu sira ne’e iha dezafiu barak, mais ita mós ultrapasa, loron ba loron ita buka atu explora medidas foun, explora aproximasaun, para depois prosesu sira ne’e bele la’o diak kada loron,” Nia hakotu.
Editór: Aquino Gomes
