Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Rui Maria de Araujo hatete, matebian hanesan sidadaun Timor-Oan, hela iha Mascarenhas, Postu Administrativu Vera Cruz, ohin dader maizoumenus tuku 3 bá HNGV ho keixa isin-manas, muta, kabun laran moras durante loron 2 iha uma. Matebian iha mós istória operasaun fatuk iha rins.
“Hafoin halo ezame fíziku no exame komplementar sira seluk, médiku sira to’o iha diagnóstiku traballu (working diagnosis) peritonite no septic shock. Aleinde, deteta mós positivu SARS-CoV2 ho Cycle Threshold (CT) N2gene 40,8, Egene 38,8,”dehan nia iha komunikadu kinta ohin (27/05).
Nune’e, matebian husi HNGV transfere ba fatin izolamentu Vera Cruz no iis-kotu iha oras 11:50 ho multiple organ failure.
Entretantu, ema ne’ebé mate ho Covid-19 hamutuk na’in 15 kompostu husi mane 10 no feto 5.
Asistente Editor: Saturnina da Costa
