SIJK Intrega Ona Mate-Isin Borges Ba Familia Featured

By Ekipa Independente Abril 15, 2021 411
Karreta Funerariu lori sai mate-isin Armindo Borges husi Sentru Izolamentu Vera Crus Dili, kinta (15/4). Foto Jonio da Costa/Independente Karreta Funerariu lori sai mate-isin Armindo Borges husi Sentru Izolamentu Vera Crus Dili, kinta (15/4). Foto Jonio da Costa/Independente

DILI:Ekipa Konjunta Saúde husi Sala Situasaun Sentru Integradu Jestaun Krize (SIJK) intrega mate-isin Armindo Borges ba familia hodi halo prosesu funebre tuir tradisaun kulturan Timor nian.

Tuir observasaun jornalista Online Independente asesu iha Sala Izolamentu Vera Crus nota, kinta ohin (15/4) hatudu katak, kuaze ema atus lima, hanesan membru SIJK, komunidade balun, veteranu sira, autoridade seguransa sira, juventude sira, inklui Madre sira no familia matebian akompaña Lider Nasionál Karismatiku, lori sai mate-isin Armindo Borges ne’ebé tula ho karreta funerariu husi ekipa konjunta saúde no ekipa Ministériu Solidariedade Sosial no Inkluzaun, ne’ebé responsavel ba prosesu funeral ba mate-isin Covid-19, iha Sentru Izolamementu Vera Crus Dili.

Molok lori sai mate-isin, eis Presidente Repúblika Xanana ne’e fó autorizasaun ba familia matebian atu ba fó omenajem ikus ba matebian no lori kedan ba halot iha semitériu tuir desizaun familia nian.

Nune’e mós ba familia sira tenki uza maskara no bainhira kaer kaixaun tenki fasé liman.

Lider Karismatiku ne’e mós hatete ba familia matebian sira bainhira halot tiha mate-isin, familia sira hotu fila mai tenki halo teste Swab.

“Ita fila husi rate mai uma ita hotu tenki halo teste Swab,”apelu Xanana iha Sentru Izolamentu Vera Cruz.

Tuir informasaun mate-isin sei halot iha semitériu Bualaran iha  Manleu.

Matebian Armindo Borges hakotu iss iha loron 11 fulan-abril, oras tuku 11:00, kalan, iha Ospital Nasional Guidu Valadares (HNGV) Dili.

Matebian ne’e deskonfia mós iha moras Covid-19, nune’e bainhira matebian hakotu iss, Sala Situasaun Sentru Integradu Jestaun Krize (SIJK) deside atu halot mate isin iha semiteriu Covid-19 Metinaro.

Maibé familia rejeita ida ne’e no konsidera matebian mate laos tan moras Covid-19.

Nune’e oan feto husi matebian Armindo Borges tanis hodi halai husu ajuda ba Lider Karismatiku Kay Rala Xanana Gusmão.

Entretantu iha loron 12 fulan-Abril, Xanana ba kedan iha Sentru Izolamentu Vera Cruz hodi hein mate isin atu nunee SIJK labele loris ai ba halot iha seminteriu Metinaro.

Iha loron ne’e kedan Xanana toba de’it iha Sentru Izolamentu Vera Cruz to’o loron ohin (15/4), hafoin Governu deside liuhusi SIJK intrega mate isin ba familia hodi halot.

 Molok desizaun Governu lidera husi Primeiru Ministru Taur Matan Ruak, Organizasaun Nasoins Unidas (ONU) liuhusi nia reprejentante iha Timor-Leste hato’o karta ofisial ba Xanana Gusmão iha Sentru Izolamentu Vera Crus.

Iha karta ne’e, ONU konfesa katak mate-isin ne’ebé mate tanba Covid-19 bele hala’o prosesu funbre tuir tradisaun no relijaun ida-idaik nia nasaun.

Hafoin ida ne’e, Governu realiza kedas reuniaun Konsellu Ministru, kuarta horsehik (14/4), maibé desizaun hotu-hotu entrega ba Primeiru Ministru Taur Matan Ruak ne’ebé lidera direita ba SIJK.

Nune’e, ohin dader, tuku 11:12 oras Timor-Leste, Xefe Governu hatuun desizaun liuhusi SIJK hodi bele lori sai mate-isin husi Sentru Izolamentu Vera Crus ba familia matebian no kontinua tuir prokotolu Organizasaun Mundiál Saúde nian iha ambito prevensaun surtu Covid-19.

 

Editor: Jose Sarito Amaral

Rate this item
(0 votes)
Last modified on Kinta, 15 Abril 2021 14:38

Independente Digital TV