Kordenadór Forsa Tarefa ba Prevenasaun no Mitigasaun Surtu Covdi-19, Sentru Intrgradu Jestaun Krize (SIJK), Dr. Rui Maria de Araújo informa, Laboratoriu Nasionál Saúde simu amostras 158 domingo horiseik husi Munisipiu Viqueque, hafoin halo análize deteta kazu pozitivu na’in 2.
“Na’in rua ne’e hotu husi Dili, na’in ida iha loron 12 fulan-Marsu ho autorizasaun SIJK nian, tanba atu ba hakoi mate, ida seluk ba iha loron 8 fulan-Marsu, na’in rua ne’e deteta pozitivu Covid-19 iha Vikeke,”dehan Dr. Rui, liu husi video zoom call, Segunda (15/03), iha sala SIJK, CCD Dili.
Eis Primeiru Ministru ne’e esplika, sidadaun na’in rua ne’e ida husi Aldeia Umane Iku, Ossu de Sima, Postu Administrativu Ossú, ida seluk husi Aldeia Lari, Suku Afaloikai, Postu Administrativu Uatu-Lari, no dadauk ne’e, ekipa konjunta saúde hala’o ona atividade buka tuir kontaktu besik husi kazu pozitivu na’in 2 ne’e.
SIJK mós relata katak katak, segunda ohin rezista tan kazu foun 7 ho nune’e pasiente Covid-19 aumenta ba 99, kompara ho númeru domingu horseik nian 97.
Kazu foun na’in 7 ne’e iha mane na’in 5 no feto na’in 2 ho idade tinan 14 mai to’o idade 43 no sira la hatudu sintomas.
“Total kazu foun Covid-19 hamutuk na’in 7, rekuperadu na’in 5 no atual baixa iha sala izolamentu Vera Crus hamutuk na’in 99,”dehan Dr. Rui liu husi zoom call.
Relasiona ho kazu Covid-19 aumenta bebeik, Governu liu husi Konsellu Ministru (KM), segunda ohin deside prolonga tan serka sanitaria no konfinamentu obrigatóriu iha kapital Dili to’o oras 23:59 loron 2 fulan abril tinan 2021.
Enkuantu Konsellu Ministru mós deside aplika serka sanitaria no konfinamentu obrigatóriu ne’e iha Munisipiu rua hanesan, Munisipiu Baucau no Vikeke to’o loron 29 fulan-marsu.
SIJK kontinua husu ba populasaun iha Dili laran tomak atu nafatin kalma, lalika pániku, hela deit iha uma wainhira laiha nesesidade atu halo movimentu bá-mai, pratíka nafatin medida sira ne’ebé ita hotu hatene ona:
- a) Uza máskara
- b) Fase liman bebeik ho sabaun ka dezinfetante ruma
- c) Wainhira kumprimenta malu, lapresiza kaer-liman, bensa-liman, rei-malu ka haku’ak malu
- d) Evita halibur malu barak
- e) Hamri’ik ka tur dook husi ema seluk, mínimu metru ida ho balu.
