Domingu, 16 Maiu 2021 | Login
Diretur Jeral Protesaun Sivil Inspektur Polisia Ismail Babo. Foto:Camilio/Independente. Diretur Jeral Protesaun Sivil Inspektur Polisia Ismail Babo. Foto:Camilio/Independente.

SEPS Kontinua Distribui Ai-han, Sei Ajusta Dadus Featured

DILI:Diretor Jeral Protesaun Sivil Inspektur Polisia Ismail Babo relata katak, Sekretario Estadu Protesaun Sivil (SEPS) seidauk bele anunsia total distribuisaun apoiu umanitaria ba vitima inundasaun ne'ebe akontese iha loron 4 fulan-Abril, tanba distribuisaun sei lao hela.

Nia dehan, to’o agora dadus fiksu ba komunidade sira ne’ebé simu ona aihan bazika no sasan ka laos aihan bazika seidauk iha tanba ekipa SEPS no Ministerio Administrasaun Estatal (MAE) sei rekolla dadus iha terenu.
“SEPS seidauk iha dadus serteza ba vitima inundasaun sira, hira mak simu ona ajudus asistensia umanitaria no hira mak seidauk, tanba ekipa husi Protesaun Sivil kontinua fahe aihan bazika iha Dili no Munisipio sira seluk ne’ebé afetadu, maibe SEPS sei ajusta dadus hotu no sei publika ba publiku," dehan Ismail iha Kaikoli ba Jornalista Online Independente, iha Tersa ne'e (04/05).
Nia informa, dadus temporariu ne’ebé tama ona iha baze de dadus total uma-kain 3.000 resin mak simu ona aihan bazika iha teritoriu nasional.
Entertantu dadus fiksu ba ema ne’ebé afetadu ba inundasaun iha loron 4 fulan-abril ne’e hamutuk uma-kain 31.337.
Tanba ne’e, SEPS sei esforsu maka'as atu nune’e vitima sira sei simu hotu asistensia uumanitaria ne’ebé antes ne’e apoiu solidariedade husi internasional, Governu, NGO, Kompania no entidade hotu ne’ebé ajuda ona ba kalamidade ida ne’e.
Nune’e, SEPS sei halo esforsu di'ak hodi ajusta dadus vitima sira hotu atu nune’e iha tempo badak sira sei hetan hotu apoiu asitensua umanitaria ne’e.
Tuir planu SEPS sei anunsia dadus ajudus asistensia umanitaria ba vitima sira hotu, intermus osamentu no asistensia humanitaria seluk husi apoiu internasional no entidade hotu ne’ebé antes ne’e oferese ona ajudus ba vitima inundasaun sira liu husi SEPS.
Ho nune’e, SEPS sei halo relatorio ida no sei fó sai ba publika bainhira ajudus ba vitima dezastre naturais sira remata.

 

Jornalista:Camilio de Sousa

Asisten Editor:Saturnina da Costa

Read 364 times
Rate this item
(0 votes)