"Loron ida ka rua tan bele la’o (fahe voucher) ona, mas ha'u orienta ona diretór jerál para ida dook ne'e mak ita tau ba kestaun uluk, ida Dili laran ita bele esforsu para ikus," dehan Ministru Jose Agustino da Silva, iha Palasiu Governu, horisehik.

Nia dehan, daudaun dokumentu preparadu hotu ona no grupu ne'ebé atu fó atendimentu ba benefisiáriu sira mós estabelesidu ona, maibé sei prepara hela produz voucher.

Molok ne'e, Diretór Jerál MTK, Gaspar de Araujo hateten, ministériu prepara ona orsamentu subsídiu kombustivel hodi implementa ona iha tempu badak.

"Ami hasai ona Dekretu Lei Mistériál para realiza. Ha'u prepara hela despaxu ministru nian para implementa," dehan nia.

Nia dehan, trasporte públiku sira hanesan bus, taksi, mikrolete, angguna, travel, no sira seluk ne'ebé dokumentu sei válidu iha direitu atu simu subsídiu, maibé ba sira ne'ebé dokumentu mate liu fulan tolu sei laiha direitu atu hetan.

Nia dehan, trasporte públiku hirak ne'e sei simu subsídiu liuhusi voucer kada ema ida loron ida litru lima (5), fulan ida hetan litru 150 no fulan tolu litru 450, maibé aereo no maritima sei haree tuir nia viazen.

"Ami kalkula ona orsamentu ne'ebé ami-nia ministériu deside ne'e preve hamutuk tokon US$ 2.8 ba transporte públiku, máritima no aereo," dehan nia.

Nia hatutan, dadus iha munisipiu 13 inklui RAEOA hamutuk 4.129, sira hotu sei iha direitu atu hetan maski loron seidauk deside atu fahe ba sira tanba sei prepara hela voucer.