Iha serimónia despedida, Adjuntu Sekretáriu Jerál Federasaun Futeból Timor-Leste, Fernando Baptista Xavier, husu jogador sira labele sente orgullu, maibé hanesan misaun no responsabilidade.
“Ha'u lori federasaun futeból nia naran, hakarak husu ba ita boot sira, labele hela de'it hanesan orgullu ba imi, maibé hanesan misaun ida ba imi, ne'ebé mak imi tenke asume responsabilidade, tanba ne'e husu imi hotu ba reprezenta nasaun, tenke tane no dignifika imagen RDTL,” informa nia, liu husi serimónia despedida ba jogadór sira, iha Xanana Sport Senter, Sesta (02/08).
Tanba nia konsidera, jogadór sira hanesan embaixadór Estadu iha nasaun seluk, tanba ne'e presiza disipliña no hatudu prestasaun, hodi dignifika bandeira hodi hamorin timor liu husi jogu futeból.
Nia mós husu jogadór sira atu rona no tau konfiansa ekipa treinadór sira, durante partisipa kompetisaun rua ne'ebé nasionál no U-20 sei tuir iha fulan agostu ne'e.
“Ita fiar katak selesaun rua ne'e sei hatudu prestasaun di'ak liu, kompara ho selesaun sira liu ba, tanba ne'e imi labele sente imi nia aan ki'ik, maibé ita fiar katak imi sei halo buat ruma ne'ebé di'ak ba ita nia nasaun,” Nia akresenta.
Iha fatin hanesan, Diretór Tekniku FFTL, Gaspar Quintão hatutan, nia parte husu jogadór sira rona malu, atu bele atinje rezultadu ne'ebé di'ak.
“Tanba ekipa rua ne'e, ekipa ida sei kompete iha jogu AFF no ekipa ida kompete iha joga AFC, tanba ne'e tenke konstra ho didi'ak, atu bele kompete iha kompetisaun ne'e ho di'ak,” Nia dehan.
Nia mos enkoraza jogadór sira, atu hatudu jogu ne'ebé diak no hatudu duni jogu ida ne'ebé orijem husi Timor-Leste.
Purtantu, Kapitaun Selesaun Nasionál Femenina, Dolores Vianda da Silva, garante sei hatudu performa di'ak bainhira partsipa jogu AFF ne'ebé sei realiza iha Vietname.
“Ha'u nia esperansa, iha performa di'ak hodi bele lori rezultadu pozitivu, ba ekipa nasinál no ba nasaun,” Nia informa.
Aleinde ne'e, sira kompremete sei hatudu disipliña no servisu hamutuk, hodi hetan rezultadu iha jogu refere.
“Ha'u hanoin bainhira ita servisu hamutuk, rona malu no kolabora hamutuk, ha'u hanoin sei lori ekipa ne'e solidu, hodi lori futeból bele sai orgullu nasionál,” Nia relata.
Entretantu, tuir orariu Ekipa selesaun nasinál U-20, sei desloka uluk iha loron domingu semana-kotuk, no sei enfrenta uluk jogu hasoru Koreia Sul, iha loron-06 fulan ne'e, no iha loron-08 sei hasoru Banglades, enkuntu jogu ikus hasoru uma-na’in Laos, iha loron-10 agostu ne'e.
Enkuantu, Ekipa selesaun nasionál femenina, sei deskola ba Vietname, iha loron-5 fulan ne'e no sei halo jogu dahuluk ho Filipina iha loron 7 fulan ne'e, no jogu seluk sei hasoru Australia no Myanmar iha grupu B.
