Treinadór Selesaun Nasionál Femenina Timor-Leste U-20, Eduardu Pareira hatete, ekipa sei esforsu hodi hatudu jogu iha kompetisaun refere, maske ekipa hamutuk ho nasaun sira ne'e forte.

“Ami nia ekipa U-23 fiar aan sei kompete di'ak liu tan, tanba sei reforsa husi jogadór diaspora na'in rua,” Dehan Treinadór U-20, Eduardu Pereira, ba jornalista sira, iha Xanana Sport Senter, Sesta (02/08).

Nia informa, hafoin jogadór timoroan na'in rua husi Austrália, mai reforsa tan, tanba ne'e kualidade ekipa U-20 di'ak liu tan, jogador rua ne'e ida sei reforsa iha liña mediu no ida sei reforsa iha liña avansadu.

Tanba, jogadór sira iha ona esperensia, depois remata partispa jogu AFF U-20 iha Vietname, tanba liu husi sira nia avaliasaun, sei hadiak liu tan kualidade jogadór iha jogu AFC ne'e sei ba partisipa.

“Ami tenta halo selesaun hodi akumula hamutuk jogadór sira, ha'u la garante bele  manan ka la manan, maibé preparadu ona atu kompete ho nasaun seluk,” Nia subliña.

Nia afirma, antes  jogadór sira ne'e atu ba  tuir ona kompetisaun AFC, sira halo ona preparasaun durante fulan ida, hodi foka ba fiziku no estratejia jogu tenik nian.

Iha fatin hanesan, Kapitaun Selesaun Nasional Femenina Timor-Leste U-20, Julieca, akresenta, sira-nia parte agradese ba ekipa treinadór sira ne'e durante akompaña sira iha sesaun treinu ni’an.

"Tanba ne'e ami sei esforsu atu kompete iha kompetisaun ida ne'e, atu bele hetan rezultadu ida ne'ebé pozitivu,” Nia aprofunda.

Nia adianta, maske durante iha treinamentu sira hasoru obstakulu oin-oin, maibé la sai bareira ba sira atu nafatin esforsu.

“Ida ne'e la’os bareira ba ami atu nafatin esforsu, tanba ne'e ami fiar katak iha kompetisaun ida ne'e, bele hetan rezultadu ne'ebé di'ak ba nasaun,” Nia akresenta.

Enteretantu, Selesaun Nasionál Femenina U-20 tama iha grupu H, hamutuk  ho nasaun, Koreia Sul, Laos no Banglades.