Prezidente, José Ramos Horta hatete, hodi povu Timor-Leste nia naran hato’o votus kmanek ba musulmuna hotu iha Timor-Leste okaziaun ksolok Eid al-Adha 2026.

“Eid al-Adha fó hanoin mai ita kona-ba istória profunda husi Profeta Ibrahim nia fiar ne’ebé metin no vontade atu sakrifika saida maka folin liu ba nia iha devosaun ba Maromak,” Mensajen PR Horta ba loron Idul Fitri, Kuarta (27/05).

Nune'e, iha Timor-Leste mós hatene kbiit perdaun nian no Beleza husi harii nasaun ida iha-ne’ebé fiar hotu bele reza ho livre, simu prinsípiu fraternidade umana hanesan trasa iha Dokumentu kona-ba Fraternidade Umana ba Pás Mundiál no Moris Hamutuk.

“Tanba ne'e, dokumentu ida-ne’e bolu  atu rekoñese katak ita hotu nu’udar membru husi família umana ida de’it, kria ho direitu no dignidade ne’ebé hanesan,” Nia informa.

Nia afirma, Timor-Leste hanesan nasaun nu’udar testemuña ba posibilidade atu moris hamutuk, etnia hotu, fiar hotu Katóliku, Musulmanu, Protestante, no fiar-na’in tradisionál sira moris hanesan maun-alin.

“Ba ita-nia maun-alin komunidade musulmanu Timor-Leste nian, imi mak parte integrante no selebra iha família diversfikada nasaun nian.  Imi-nia kompromisu ba pás, imi-nia nia servisu maka’as hodi harii ita-nia demokrasia joven, no imi-nia espíritu jenerosidade durante époka santa ida-ne’e hametin espíritu kle’an husi ita-nia nasaun,” Haktuir PR Horta.

Aleinde, ba komunidade musulmanu iha mundu tomak, Timor-Leste hamriik hamutuk ho sira. Iha mundu ida ne’ebé dala barak nakfera tanba konflitu no dezentendimentu.

“Eid ida-ne’e sai hanesan inkarnasaun moris ida husi fraternidade umana,” Nia relata.

Tanba ne’e, mai hanoin katak laiha ema ida maka superiór liu fali ema seluk, só sira ne’ebé serbí umanidade ho kompaixaun mak verdadeiramente boot.

“Maibé, bainhira imi halibur hamutuk ho imi-nia família, hasa’e imi-nia orasaun, no fahe imi-nia hahán sira ho sira ne’ebé iha susar, hatene katak imi la mesak. Imi nia ksolok mak ksolok, imi-nia pás mak mundu nia esperansa,” Tenik PR.

Tanba ne’e, PR Horta hein katak Eid al-Adha ida-ne’e lori ksolok, pás, no prosperidade ba família no komunidade sira.

“Hein katak ida-ne’e bele hametin liután ligasaun sira ne’ebé halibur ita nu’udar povu ida de’it, no bele inspira ita hotu atu kontinua serbisu hamutuk ba Timor-Leste ida ne’ebé justu, kompaixaun, no prósperu liu. Eid Mubarak ba ita nia komunidade Musulmanu tomak,” Konklui PR Horta.