Sekretáriu Estadu Kooperativa, Arsénio Pereira da Silva hatete, sei hala’o vizita ba Serikat Petani Indonésia (SPI) iha Jakarta-Indonésia hodi ko’alia hamutuk, oinsá bele haruka grupu kooperativa TL ba aprende.
"Ha’u nia vizita ida ne'e atu mai fahe esperiénsia ba malu no ba futuru sei rekomenda ita nia kooperativa sira iha Timor-Leste atu bele ba aprende esperiensia SPI nian, liu-liu kona ba área kooperativas nian," haktuir iha komunikadu imprensa ne'ebe jornal Independente asesu husi pajina SEKooP, (23/02).
Objetivu husi ba vizita Sekretariadu SPI hodi fahe esperiénsia ba malu, tanba SPI ninia servisu barak liu ho kamponezes sira iha área rural.
Sira (SPI) mos harii Kooperativa ida ho naran Kooperasi Petani Indonésia (KPI) ne’ebé ninia membru maiória hala'o atividade produsaun agrikula.
Iha fatin hanesan, Majelis Nasional Petani, Muhammad Harris Putra senti kontente tanba hetan vizita husi SEKooP TL ho ninia delegasaun, durante iha reuniaun ko'alia kona-ba dezenvolvimentu seitor kooperativa.
Timor-Leste no Indonésia iha relasaun biletareal ne’ebé diak tebes, ne’e duni liu programa sira hanesan ne’e, membru kooperativa husi parte rua bele aprende ba malu, hodi nune'e ba futuru seitor kooperativa bele fó benefísiu diak liu ba ninia membru sira.
