“Ohin (horikalan) loron ikus no kalan ikus ba tinan 2021 nian, ohin kalan ita selebra ita nia despedida tinan tuan ho tinan foun diferente ho tinan uluk. Tinan uluk ita mai ho subar, ita mai iha distansia, ita tinan ida ne’e, ita mai hamutuk, mai ho ksolok tanba laiha impedementu, tanba tinan uluk tinan pandemia nian, nune’e Iha tinan ida ne’e grasa ita na’in jesus kristu nian, tanba, liberta ona ita husi moras aat ne’ebé da’et iha mundu tomak,”dehan nia Ómilia iha selebrasaun misa tedeum, iha igreja Katedral Santo Antonio Baukau, sesta (31/12).

Nia hatutan, tinan ida ne’e, maluk sarani sira ne’ebé na’in jesus kristu hadomi mai hamutuk, uluk nanain agradese ba maromak liu husi eukaristia ida ne’e.

“Tanba iha tinan uluk ema ida ne’ebé selebra misa hamutuk ho ita, iha kalan ida ne’e nia lahamutuk ona ho ita, hanesan ita nia Amo Bispo Dom Básilio, tinan uluk ami na’in rua mak selebra hamutuk, maibé tinan ida ne’e ha’u mesak mai iha imi nia leet. Maske nune’e, ita nafatin agradese no laran metin ba maromak, tanba maromak mak hadomi ita diak liu ita rasik hadomi ita nia an no  ema seluk hadomi ita,”esplika Amo Manuel.

Nia haktuir, dadaun ne’e ema hotu moris iha situasaun global, situasaun ne’ebé enfrenta relativismu no pandemismu nian.

“Natal fanun ita no fó hanoin mai ita katak, sem maromak ita laiha futuru, ita labele moris tanba maromak deit mak hanorin ita atu hatene ita nia dignidade umana nudar maromak oan iha nia oan jesus kristu,”hakotu nia.

Entretantu, tuir observasaun Online INDEPENDENTE iha terenu nota katak, selebrasaun misa tinan foun ne’e, madre, frater no mós sarani sira barak iha areadores igreja nian no igreja laran nakonu.

Enkuantu, iha selebrasaun ne’e, bainhira iha ómilia udan mós tun durante minute balun, maibé sarani sira lalakon vontade no nafatin asiste misa selebrasaun ne’e to’o misa remata.