“RHTO realiza workshop konaba sensibizasaun difisensia nia de'it ba kargo xefia no diretor husi Sekretáriu Tékniku Administ Estatal (STAE) no Komisaun Nasional ba Eleitoral (CNE). Sensiabilizasaun ida ne'e hodi bele asegura de'it ba eleisaun parlamentar 2023," dehan Diretór Ezekutivu RHTO Joãozito do Santos, kinta ne’e (23/03).
Nia dehan, liu husi workshop ne'e, bele ajuda ona STAE ho CNE sira atu iha koñesimentu oituan konaba asuntu difisiensia nia iha eleisaun no mós sira bele hatene konaba nesesidade EhD nian iha eleisaun parlamentar.
Kona ba ema ho defisiensia sira atu asesu livre ba iha sentru votasaun sira, Diretor dehan, RHTO mós iha ona kolaborasaun no komunikasaun diak ho CNE no STAE atu asegura ema ho defisiénia iha eleisaun parlamentar 2023.
Iha fatin hanesan, Prezidente CNE José Agostinho Belo hatete, workshop ne'e importante atu fó hanoin ba parte STAE no CNE hodi kria kondisaun ba EhD hodi partisipa iha eleisaun parlamentár 2023.
"Ohin treinamentu husi organizasaun difisensia sira nian ne’e katak sira mós hakarak fó formasaun ba STAE no CNE, atu iha eleisaun tenke livre no transparánsia ba sira hanesan mós sira ne’ebé la ho defisiénsia," dehan nia.
Prezidenti esplika, CNE mós sei prepara no hanoin atu tau kabina votu, rampa ba ema ho defisensia sira, nune'e sira bele ezerse sira-nia direitu iha eleisaun parlamentar.
Entretantu, Diretór Nasionál Administrasaun no Finansa iha STAE Ángelo Bano Fernandes, fó apresia boot ba inisiativa hosi RHTO hodi realiza workshop ne'e hodi komunika ho órgaun eleitoral kona-ba envolvimentu ema ho defisiensia iha eleisaun lejizlativa ne'ebé livre no di'ak.
