Tanba ne’e motorista sira husi mikrolete 01 to’o 12 halo greve hasoru Governu iha Palasio Governu nia oin, sesta ohin (30/04).

Bazeia ba rezulusaun Governu nian ne’ebé reativa hikas konfinamentu obrigatoriu iha Dili hahú husi oras 00:00 loron 30 fulan-maio to’o oras 23:59 loron 13 fulan-maio tinan 2021, ne’ebé bandu mós transporte públiku halo movimentasaun.

Tuir Porta-voz motorista Adão de Deus hatete, pronto submeter ba desizaun Governu nian, maibé husu atu autoriza transporte públiku kontinua buka osan hodi sustenta uma laran.

“Governu hapara hotu ami nia atividade sira ne’ebé ami halo loro-loron hodi lori mikrolet buka osan ne’e los, maibé ami la-aguenta ona, tanba barak mak hela iha kos, osan laiha ona hodi selu, nomós hahan menus entaun ami ba buka iha ne’ebé,”dehan nia iha ambitu greve.

Iha fatin hanesan motorista 03, Aniceto dos Santos hatete, sira sei halibur malu nafatin halo greve to’o Parlamentu Nasional, hodi nune’e Governu fó solusaun imediata.

“Ami ezije ba Governu bainhira hapara ami nia atividade movimento transportasaun mikrolet husi 01 to’o 12 entaun Governu tenki fó subsidiu, tanba motorista sira maioria hela iha kost no agora dadaun osan laiha atu selu kost,”dehan nia.

Jornalista:Camilio de Sousa

Editor:Jose Sarito Amaral