Ministra Saúde Odete Maria Freitas Belo hatete, bainhira Ministeriu Edukasaun Juventude no Desportu (MEJD) iha ona hanoin atu reativa eskola tenke prepara material no kontrolu estudante sira hodi lao tuir protokolo MS nian.
Nia hatutan, estudante barak bainhira ba eskola sira kumpri duni regras uza maskra no distansia sosial, maibé bainhira sai husi eskola sira la uza maskra no lao halimar iha fatin publiku.
Tanba ne’e, MS husu ba estudante sira liu-liu universidade sira tenke sai ezemplu diak oinsa atu halo prevensaun, atu kazu ne'e labele sa’e nu'une bele reativa eskola.
“Bainhira hakarak duni eskola favor la’o tuir protokolo ne'ebé iha, atu nu'une moras ne'e labele aumenta,”dehan nia iha Palasiu das Cinzas kaikoli, segunda ne’e (13/09).
Enkuantu, Governante ne’e dehan, iha fulan kotuk liu-ba MEJD loke eskola deside reativa fali ativiade aula prezensial hafoin iha eskola ida iha estudante 50 mak hetan positivu, nune’e deside taka eskola hotu iha Dili laran.
Nia akresenta, maske estudante sira balun simu ona vasina kompletu maibé tenki tuir nafatin protokolu saúde nian.
Tanba ne’e, MS garante katak, MEJD reativa fali aula prezensial estudante sira bele kumpri protokolu saúde nian no eskola sira bele la'o ho diak.
Entretantu, molok ne’e Ministru Edukasaun Armindo Maia, husu ba professor sira atu prepara kondisaun iha eskola bainhira reativa fali aula prezensial. Aleinde, husu ba professor no estudante atu simu vasina.
Asistente Editor: Saturnina da Costa
