Tersa, 07 Dezembru 2021 | Login
Vasina Covid-19. Foto:Dok. Vasina Covid-19. Foto:Dok.

Professor Na’in 998 Iha Baukau Seidauk Simu Vasina

DILI: Diretor Edukasaun Munisipiu Baukau, Augusto Ornai Ximenes hatete, Diresaun Servisu Edukasaun Munisipiu Baukau fó ona informasaun ba professor hotu atu simu vasina.

“Agora dadaun ita nia professor hamutuk 998 mak seidauk simu vasina, tanba ne’e ha’u kontinua fó nafatin informasaun ba sira hodi simu vasina, maioria ita nia professor sira iha Munisipiu Baukau simu ona vasina, atu nune’e antes reativa hikas ita nia ensinu prossesu aprendijazem, hakarak ita nia professor 100 % simu ona vasina, hodi labele fó impaktu ba iha ensinu prossesu aprendijazem nian,” dehan nia iha via telephone sabado ne’e.

Nia relata, eskola iha Munisipiu Baukau agora dadaun suspende hela, tanba Governu aplika hela serka sanitaria iha Munisipiu refere.

Tanba ne’e, Diresaun Edukasaun Munisipiu Baukau simu informasaun husi MEJD, atu apela nafatin ba professor sira hotu tenke simu vasina.

Enkuantu, tuir dadus total professor iha Munisipiu Baukau hamutuk 2,371, husi númeru ne’e na’in 1,373 simu ona vasina no na’in 998 seidauk simu vasina.

Entretantu, molok ne’e, Vise-MEJD António Guterres hatete,  maske iha situasaun Covid-19, maibé husu nafatin ba professor sira atu kolabora hodi kria unidade reorganiza ensinu aprendijazem ne’ebé efektivu no efikazia.

“Bazeia ba situasaun ida ne’e hau hakarak apela nafatin ba ita nia professor sira hotu iha munisipiu, atu bele simu vasina kontra pandemia Covid-19, nune’e labele fó impaktu ba ita nia estudante sira iha prossesu ensinu aprendijazem nian,” dehan nia.

Governante ne’e apela ba professor sira ne’ebé simu ona vasina tenke lori kartaun vasina nian ba Dirijente Munisipiu, atu bele hatene eskola ida ne’ebé professor sira maioria simu ona vasina, nune’e bele realiza sira nia prossesu aprendijazem.

Read 388 times
Rate this item
(0 votes)