Tersa, 07 Dezembru 2021 | Login
Diretor Edukasaun Munisipiu Baukau, Augusto Ornai Ximenes. Foto:Dok. Diretor Edukasaun Munisipiu Baukau, Augusto Ornai Ximenes. Foto:Dok.

Edukasaun Baukau Rekomenda ba MEJD Reativa Aula Prezensial, Prepara ba Ezame Daruak

DILI: Diretor Edukasaun Munisipiu Baukau, Augusto Ornai Ximenes hatete, Diresaun Servisu Edukasaun Munisipiu Baukau halo ona enkontru ho Prezidente Autoridade Munisipiu ho Sentru Integradu Jestaun Krize (SIJK), hodi rekomenda ba Ministériu Edukasaun Juventude no Desportu (MEJD) atu bele reativa hikas aula prezensial ba estudante sira.

Nune’e, sira bele prepara hodi realiza ezame ba daruak nian.

“Ita inkontru hamutuk ona ho Prezidente Autoridade Munisipiu nian inklui mós SIJK sira, ho ida ne’e ita hakarak husu ba MEJD hodi bele reativa hikas ona aula prezensial nian, atu nune’e ita bele realiza ona ezame daruak nian, nune’e ba oin prepara fali ba ezame nasional,” afirma nia via telephone, sabadu (18/09).

Tanba ne’e, agora dadaun Servisu Edukasaun Munisipiu Baukau hein hela desizaun husi MEJD.

Entretantu, antes ne’e, MEJD hasai despaixo ida hodi suspende provizoriamente atividade aula prezensial iha Munisipiu Baukau  to’o loron 10 fulan-Setembru 2021, relasiona ho implementasaun serka sanitaria iha Munisipiu refere.

Enkuantu, molok ne’e, Ministra Saúde Odete Maria Freitas Belo informa ba estudante sira, bainhira reativa fila-fali aula prezensial,  estudante sira tenki tuir protokolu saúde nian, uza maskara, distansiamentu fiziku no fase liman bebeik ho sabaun.

Read 242 times
Rate this item
(0 votes)