Tuir Konstituisaun haruka (liuhusi artigu 115, n°1, alínea d) no artigu 145°, n°1), tinan-tinan, Governu mak iha kbiit atu prepara proposta Lei refere ba Orsamentu Jerál Estadu (OJE).
Governu hato’o proposta-Lei kona-ba OGE 2022 ba Parlamentu Nasionál iha 15 outubru 2021, montante total USD 1,675.000.000. Tanba deputadu sira aprova proposta foun liu 100 durante diskusaun espesialidade, Parlamentu Nasionál hato’o Dekretu kona-ba OJE 2022 ba Prezidente Repúblika, ho montante total liu biliaun rua (usd 2.178.328.791)
Hafoin tetu klean Dekretu kona-ba Orsamentu Jerál Estadu ba tinan 2022, Prezidente Repúblika Francisco Guterres Lú Olo, ho kbiit konstistusionál, promulga Diploma n°55/V ne’ebé dekreta husi Parlamentu Nasionál, iha 16 dezembru liubá.
“Ho promulgasaun husi Prezidente Repúblika, lei ne’e tama en-vigor iha loron tuir kedas publikasaun iha Jornál Repúblika, ho efeitu husi 1 janeiru 2022,”dehan nia iha komunikadu ne’ebé Online INDEPENDENTE asesu segunda ne’e (03/01).
Ho nune’e, tama iha Orsamentu Jerál Estadu 2022 reseitas no despezas Estadu nian, inklui fundus no servisus autónomus no orsamentu seguransa sosiál.
Tuir komunikadu imprensa husi Governu, Orsamentu 2022 sei tau matan ba prioridade nasionál neen, hanesan, 1) dezenvolvimentu kapitál umanu ( edukasaun, formasaun profisionál no saúde), 2) abitasaun no inkluzaun sosiál, 3) setór produtivu sira (agrikultura no turismu), ambiente no konetividade, 4) dezenvolvimentu setór privadu, 5) dezenvolvimentu rurál no 6) boa governasaun.
