Adjuntu Sekretáriu Jerál FRETILIN, Flávio Maria Guterres da Silva hatete, reniaun Komite Sentral Fretilin (CCF) iha 3 no 4 Setembru ne’e halo aprovasaun ba relatóriu komité sentrál, rejimentu Kongresu Nasionál dalima no revizaun ba estatutu.

“(Revizaun ba estatutu) Komisaun Nasionál Polítika halo ona apresiasaun iha loron 2 Setembru depois loron 3 to'o 4 (Setembru), iha kedas reniaun Komité Sentrál, iha reuniaun ne'e mós ajenda hanesan de'it ba CPN nia reniaun ne'e, halo apresiasaun no aprovasaun ba rejimentu V Kongressu nasionál, teze Kongresu Nasionál no diskuti no aprovasaun alterasaun estatutu ida ne'ebé atu lori ba V Kongressu Nasionál ne'e," dehan nia via telefone ba Jornalista Jornál INDEPENDENTE, Segunda (05/09).

Nia hatutan, artigu lubuk mak hetan alterasaun no iha mós adiamentu ba artigu foun balun atu akomoda eis Frente Armada, eis klandestina no eis frente diplomatika sira.

"Ho sentidu atu halo moris fila-fali baze sientista Fretilin ni'an, tantu artigu ne'e mak sei akomoda kamarada sira kombate veteranus sira ne'ebé mak uluk luta armada, klandestina no diplomatika atu hamutuk ho Fretilin ne'e hamoris fila-fali baze siensista Fretilin."

"Agora ami prepara hela proposta alterasaun ba estatutu ne'e lori ba V Kongressu nasionál hodi ein-vigór hahú depois kongressu ne'e ba oin, tanba ne'e mak seidauk book ba perfil ne'e, tanba perfil ne'e sei iha," nia informa

Reniaun CCF ne’ebé la’o durante loron rua iha diskusaun forte no maka'as kona-ba ajenda tolu ne'e, maibé komité konkorda atu lori dokumentu ba kongresu nasionál.

Ida ne'e, nia hatete, nu’udar enkontru Komité Sentrál mandatu 2016 to’o 2022 ne'ebé lídera husi Prezidente Partidu no Sekretáriu Jerál.

"Tuir estatutu see mak prezide komisaun polítika nasionál mak Sekretáriu Jerál no Prezidente mak konvoka no prezide reniaun komité sentrál.”

Kona-ba pakote hira mak sei mosu iha Kongresu Nasionál, Flavio husu atu aguenta lai to'o kongresu mak bele hatene ona pakote hira no see-see.

Kona-ba pakote alternativa Jenerál Lere ho Rui, nia hatete, pakote bele ida, rua no bele liu.

"Hanesan esplika fila-fali dezde ke tuir kritéria perfil kandidatu nian ne'e see de’it benvindu, depois kongressu mak sei deside, tanba kongressu mak soberanu, kongresu hatene atu fó konfiansa ba see atu lídera Fretilin ne'e," katak nia.

Entretantu, KN Fretilin sei realiza iha Sentru Konvensaun Dili hahú iha loron 8 to'o 10 Setembru ne’ebé sei partisipa husi delegadu sira. Tuir aprovasaun ikus, delegadu ne’ebé iha direitu votus hamutuk 930 no suplentu 67.