PR Lú Olo: Uluk Ami Ba Servisu Sa’e Taksi Featured

By Cristina Ximenes Outubru 30, 2018 2199
Prezidente Repúblika, Francisco Guterres ‘Lú Olo’ Prezidente Repúblika, Francisco Guterres ‘Lú Olo’

DILI: Prezidente Repúblika, Francisco Guterres ‘Lú Olo’ admira uitoan ho deputadu sira ikus ne’e ninia hanoin tanba buka sa’e karreta luxu de’it.

Kompara ho uluk kuandu Lú Olo sei asume kargu Prezidente Parlamentu Nasionál, deputadu sira ba servisu sa’e de’it taksi, maibé reprezentante povu sira ne’e laiha ema ida maka foti kestaun bainhira la sa'e karreta luxu.

“Uluk ha’u nia tempu ha’u Prezidente Parlamentu Nasionál ami sa’e taksi de’it maka hodi mai servisu”, dehan nia, foin lalais ne’e.

Nia mós kompara katak, uluk iha tempu primeira lejizlatura nian deputadu sira simu perdiem $5. Sira mós la sa’e karreta luxu Prado ka Pajero hanesan deputadu sira agora ne’e.

“Ne’e Ami nia esperiénsia, maibé agora oin seluk ona”, tenik nia.

Xefe Estadu la esplika nesesáriu ka lae atu deputadu sira tenke uza viatura luxu, maibé esperiénsia uluk maka servisu PN nian la’o efetivu nafatin maski ba servisu ho taksi.

Kona-ba asaun pasifika ne’ebé sosiedade sira halo hodi kontra PN, PR Lú Olo hateten, seidauk simu informasaun ofisial kona-ba sosa karreta foun husi Prezidente PN.

PR Lú Olo hateten, lei fó dalan ba asaun ne’ebé estudante halo atu bele espresa sira-nia hanoin, tanba ne’e Parlamentu Nasionál tenke fó preokupasaun ne’e.

“Ita espera saida maka atu bele ne’e Parlamentu Nasionál bele responde ba estudante sira”, dehan nia.

Asaun manifestasaun MUTL hahú iha Sesta (26/10), envolve husi universidade hotu iha Dili laran, ne’ebé kontra desizaun PN atu sosa karreta foun ba deputadu sira ho marka Pajero.

Rate this item
(0 votes)
Last modified on Tersa, 30 Outubru 2018 12:48

Independente Digital TV

Tuir ami iha Twitter

Kalendariu Notisia

« July 2024 »
Mon Tue Wed Thu Fri Sat Sun
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31