PR Lú Olo sei Tetu Pedidu Governu ba EE Featured

By Ekipa INDEPENDENTE Agostu 05, 2020 3370
DILIPrezidente Republika Francisco Guterres Lú Olo. DILIPrezidente Republika Francisco Guterres Lú Olo.

DILIPrezidente Republika Francisco Guterres Lú Olo deklara nia sei konvoka enkontru ho Konsellu Superior Defeza no Seguransa no Konsellu Estadu molok foti desizaun.

Liu husi Komunikadu Imprensa ne'ebe Jornal INDEPEFENTE asesu iha pajina ofisial Palasiu Prezidensial Bairu-Pite, Tersa (04/08), hatete, iha 4 Agostu, PR Lu Olo simu ona pedidu atu halo deklarasaun EE ba períodu loron 30 iha territóriu nasionál tomak, husi governu.

“Haree ba artigu 85, alínea g) Konstituisaun RDTL, Prezidente Repúblika konvoka membru sira seluk husi órgaun konsulta—Konsellu Superior Defeza no Seguransa no Konsellu Estadu—atu rona idaidak ninia hanoin kona-ba pedidu deklarasaun estadu emerjénsia husi Governu.”

Tuir planu, reuniaun Konsellu Superior Defeza no Seguransa sei hala’o iha Kuarta (05/08), tuku 9.30 no Konsellu Estadu, iha tuku 11.00

“Hafoin tetu opiniaun husi membrus Konsellu Superior Defeza no Seguransa no Konsellu Estadu mak Prezidente Repúblika foin deside. Karik Prezidente Repúblika deside katak presiza duni deklarasaun Estadu Emerjénsia, sei husu autorizasaun husi Parlamentu Nasionál, liu husi mensájen ida. Karik Parlamentu Nasional aprova pedidu ne’e, Prezidente Repúblika sei deklara Estadu Emerjénsia liu husi Dekretu Prezidensiál,” informa komunikadu ne’e.

Iha karta ne’e, informa mós katak Prezidente Repúblika hato’o ona konvite ba membru hothotu husi Konsellu rua ne’e atu partisipa iha reuniaun refere.

Entretantu, membru  sira ne’ebé halo parte Konsellu Superior Defeza no Seguransa mak: Prezidente Repúblika Francisco Guterres Lú Olo, Primeiru-Ministru no Ministru Interiór Taur Matan Ruak, Ministra Negósius Estranjeirus no Kooperasaun Maria Adalzija Magno, Ministru Defeza Filomeno Paixão,   Ministru Justisa Manuel Cárceres, Xefe Estadu Maior Jeneral F-FDTL Lere Anan Timur, Komisáriu PNTL Faustino da Costa no Diretór Jerál Servisu Nasionál Intelijénsia Manuel Serrano. Halo mós parte iha Konsellu ne’e, membru sira nomeadu husi Parlamentu Nasionál: Adérito Hugo da Costa, David Dias Ximenes, Abel Pires da Silva. Membru sira nomeadu husi Prezidente Repúblika mak: José Manuel Fernandes ‘Nakfilak’ no Cristina da Silva.

Membru  sira ne’ebé halo parte Konsellu Estadu mak: Prezidente Repúblika Francisco Guterres Lú Olo, Eis Prezidente Repúblika Xanana Gusmão, Eis Prezidente Repúblika José Ramos-Horta, Eis-Prezidente Repúblika no atuál Primeiru Ministru Jeneral Taur Matan Ruak, Prezidente Parlamentu Nasionál Aniceto Longuinhos Guterres Lopes.  Hola parte mós Konsellu ne’e membru sira nomeadu husi Prezidente Repúblika mak: Óscar Lima, Alcino de Araújo Barris, Maria Dadi Soares Magno, Laura Soares Abrantes no Faustino da Costa.  Husi Parlamentu Nasionál: Eduardo de Deus ‘Dusae’, Aurora Ximenes, José Cornélio Guterres, Árcangelo de Jesus Gouveia Leite no José dos Santos ‘Naimori Bucar’.

Aleinde membru hirak ne’e, hanesan akontese iha reuniaun sira Konsellu rua ne’e nian iha ámbitu pedidu deklarasaun estadu emerjénsia ne’ebé liu ona, Prezidente Repúblika konvida mós Rui Araújo no Danina Coelho, nu’udar médiku, no Diretor Ezekutivu FONGTIL Daniel dos Santos Carmo.

Rate this item
(0 votes)

Independente Digital TV