PR Lú Olo Fó Hanoin: Di’ak Liu Aprova LAK Featured

By Cristina Ximenes Juñu 25, 2020 2536
 PR Lú Olo. PR Lú Olo.

DILI:Iha serimonia pose ba membru governu 21, Prezidente Repúblika Francisco Guterres Lú Olo fó hanoin atu di’ak liu tau iha ajenda hodi hahú diskuti no aprova Lei Anti-Korrupsaun (LAK).

Tuir PR Lú Olo, korrupsaun sai tiha ona fenómenu ida ne'ebé afeta ona nasaun barak iha mundu, inklui Timor-Leste.

Lú Olo dehan, korrupsaun ne’e hamoras estadu no fó impaktu la di’ak ba ninia lala’ok, bele hamate valór prinsipál sira, no halakon prátika importante lubuk ida, hanesan transparénsia, ne’ebé sai kondisaun sine qua non ba Estadu Demokrátiku.

“Atu kombate  di’ak liu korrupsaun, urjente tebes tau iha ajenda, diskute no aprova Lei Anti-Korrupsaun,” dehan nia iha serimonia pose ba membru governu na’in 21 iha palasiu prezidensial Bairo-pite, Kuarta (24/06).

Xefe Estadu ne’e dehan, prátika korrupsaun iha Administrasaun Públika tomak no iha organizasaun nia laran hatudu katak moral sosiedade nian menus babeibeik ona.

Tan ne’e, Lú Olo sujere mós atu fiskaliza oinsá partidu politiku sira uza osan iha sira-nia atividade no liuliu iha prosesu eleitorál sira.

“Nune'e sinál korrupsaun tenke sai preokupasaun ba ema hotu-hotu no ema hotu tenke luta hasoru prátika hirak ne’e ho forma koordenadu no efikás”.

"Ba luta ida ne’e, ita tenke  envolve sidadaun sira, sosiedade sivíl organizadu, ita tenke habiit instituisaun Estadu sira ne’ebé simu knaar atu kombate prátika sira ne’ebé la tanen funsaun públika sira ho di’ak  no estraga instituisaun sira-nia lala’ok demokrátiku," dehan nia.

Rate this item
(0 votes)

Independente Digital TV