Iha komunikadu imprensa ne’ebé asesu husi pájina ofisiál Prezidénsia Repúblika, Prezidente hatete katak tema komemorasaun tinan ida ne’e – “Direitu sira, Justisa, Asaun: Ba Feto no Labarik-Feto Hotu” – iha ligasaun kle’an ho jornada povu Timor-Leste nian.

“Povu Timor-Leste kompriende di’ak signifikadu liafuan sira-ne’e. Direitu sira la iha justisa hanesan de’it tinta iha surat-tahan, no justisa la iha asaun hanesan promesa mamuk,” dehan Ramos-Horta iha komunikadu ne’e.

Prezidente mos subliña katak luta ba direitu feto la’ós de’it kona-ba rekoñesimentu legal, maibé tenke asegura katak direitu sira-ne’e implementa duni iha vida lor-loron. Nia hatete, direitu feto inklui direitu atu moris livre husi violénsia, direitu atu hetan eransa no sai na’in ba rai, no direitu atu partisipa tomak iha vida polítika no ekonómika nasaun nian.

Tuir Prezidente, konseitu justisa mos tenke haree liu fali tribunál sira. Justisa signifika katak labarik-feto ida iha aldeia remota mos tenke iha oportunidade hanesan atu hetan edukasaun hanesan nia maun. Lei mos presiza proteje feto hotu-hotu, la haree ba kondisaun sosial ka ekonomia.

Iha parte seluk, Ramos-Horta dehan katak governu mos fó atensaun boot ba empoderamentu ekonómiku feto. Dezde hahú nia mandatu prezidensiál, programa prezidénsia fó apoiu ba kriasaun inisiativa Empoderamentu Ekonómiku Feto, hodi ajuda feto sira ne’ebé iha negósiu ki’ik no médiu atu hametin sira-nia atividade ekonomika.

“Feto ida ne’ebé iha kbiit ekonómiku mak ajente mudansa iha komunidade. Bainhira ita empodera feto no inan sira, automatikamente ita hasa’e rendimentu família, hadia kualidade moris no lori ekonomia nasaun ba oin,” hatete tan Prezidente.

Aleinde ne’e, Prezidente mos subliña importánsia edukasaun ba labarik-feto sira. Nia hatete katak governu sei fó prioridade ba konstrusaun dormitoriu ba labarik-feto sira iha Dili, ho apoiu hosi United Arab Emirates, atu garante fatin seguru ba sira ne’ebé mai husi área remota atu kontinua sira-nia estudu.

Tuir Ramos-Horta, fatin seguru atu hela sei fó oportunidade ba labarik-feto sira atu konsentra ba estudu, mehi boot liután, no kontribui ba dezenvolvimentu nasaun iha futuru.

“Luta ba direitu feto mak luta ba dame ida ne’ebé justu no dura. Ne’e maka luta ba mundu ida ne’ebé di’ak liu, ekuitativu liu ba ema hotu,” hatete Prezidente.

Iha okaziaun International Women’s Day, Ramos-Horta konvida povu hotu atu la para de’it iha promesa, maibé foti asaun konkreta liu husi empoderamentu ekonómiku feto no garantia katak labarik-feto sira bele kontinua iha eskola, atu harii sosiedade ida ne’ebé respeita dignidade, liberdade no dame ba feto hotu.