"Ita-nia relasaun ho Xina importante tebes, tanba rai ida poténsia globál no poténsia iha Aziátika. Ita bele hateten ita-nia viziñu, ne'e duni ita buka relasaun di'ak hanesan rai hotu-hotu besik ka dook maibé ho rai sira ne'ebé besik tenke hametin liután relasaun," dehan nia, iha Hotel Turismo, Sesta (30/9).

PR Horta dehan, loron importante tebes iha sira-nia proklamasaun nu'udar Repúblika Populár Xina. Tantu relasaun di'ak, tanba ne'e Xefe Estadu mai ho membru Governu hatudu solidariedade no amizade hodi selebra.

Tanba, hahú kedas iha tempu Timor-Leste nia restaurasaun indepedénsia 2002, Xefe Estadu dehan Xina apoiu oioin liuhusi relasaun bilaterál, maibé liuhusi sistema Organizasaun Nasoins Unidas nian.

Liuliu haruka polísia hola parte forsa pás. Apoiu seluk iha setór infraestrutura, edifísiu públiku, agrikultura no iha tinan sira nia laran ne'e komérsiu Xina aumenta iha Timor nia ekonómia, tanba materia konstrusaun sai barratu liu, timoroan bele asesu besi, simente fasil liu duke uluk.

Iha fatin hanesan, Embaixadór Xina iha Timor Leste, Xiao Jianguo hatete, Xina sempre benvindu ho nasaun hotu iha mundu, inklui Timor-Leste hodi servisu hamutuk, lori prospriedade ba povu hodi atinji inisiativu dezenvolvimentu globál no inisiativu seguransa globál.

Nia dehan, estabelesimentu relasaun bilaterál ka diplomátika Xina ho Timor-Leste durante tinan 20 hatudu relasaun di'ak tebes.

Nia haktuir, Xina fó ona asisténsia no apoiu dezenvolvimentu Timor Leste iha área oioin. Xina sempre firme ho Timor Leste iha tempu difísil no urjente.

Nia hatutan, partikularmente durante iha Covid-19, Xina hanesan nasaun dahuluk oferese kuantidade vasina no ekipamentu médiku, no mós iha katástrofe kalamidade liu ba oferese apoiu umanitáriu. No nia fiar katak futuru kooperasaun Xina ho Timor Leste sei haklean liu tan iha senáriu fantástiku ka furak tebes .