PR Horta hatete, nia konkorda 100% desizaun husi PM Xanana hodi nomeia Longuinhos nu’udar Diretór Jerál Servisu Nasionál Intelejensia (SNI).

"Klaru ha'u konkorda. Ha'u apoiu 100%. Ha'u halo karta ba Primeiru Ministru, ha'u konkorda ba nomeiasaun ida ne'e,” dehan PR Horta ba jornalista hafoin vizita HNGV, Bidau, Kinta (07/09).

Tuir Horta, Diretór Jeral SNI labele mete politika no labele mete iha servisu polisia ka servisu Polisia Sientifiku Investigasaun Kriminal (PSIK) nian.

“Maibé Diretór SNI foun hatene ona, labele mete iha polítika, labele mete iha buat ne'ebé polísia nia servisu ka PSIK nia servisu. SNI nia servisu mak informa informasaun estratéjika, la'ós ba sateia fali labarik sira halimar ho droga ka mete buat hotu-hotu, labele.”

"Ne'e ha'u rasik aviza, labele halo hanesan uluk, SNI la'ós polísia, la'ós PSIK, la'ós polísia militár," deklara Horta.

Molok ne’e, Koronel Amico asume knar nu’udar Diretór Jeral SNI iha tinan 2021 ba periodu tinan haat. Maibé molok kompleta mandatu tinan rua, PM Xanana deside hodi hasai nia.

Diretór Jerál SNI sesante ne’e konsidera ezonerasaun ne’e normal. Maibé nia duvida ho lia-fuan ‘partidariza’ SNI iha karta ezonerasaun husi PM Xanana ne’ebé nia simu.

“Ezonerasaun ne'e buat ida normál, ba ha’u ne’e normál, tanba saida? nasaun ne’e ba Timor-oan hotu, maibé iha buat balun ha’u mós dúvida, pergunta boot ida mai ha’u mak hakerek iha (karta ezonerasaun) ne’e dehan katak ‘SNI partidariza’. Ha’u ladun hatene, ha’u nia servisu ne’e ha’u servi ba partidu saida? Ida ne’e mak ha’u la hatene, mais ha’u hanesan na-kualidade veteranu, ha’u-nia partidu mak nasaun.”

“Uluk, loos duni, partidu Fretilin mak lori povu, kria FALINTIL, ne’e loos, ema hotu koalia dehan katak tenke muda M ne’e ba T, tanba ne’e muda ba CNRT, ativu tinan ida de’it, Timor Leste konsege ukun-aan.”

“Mais kuandu ukun aan hotu tiha, FALINTIL iha Aileu ne’e muda ba F-FDTL, iha ne’eba ne’e, polítika ami entrega, ami halo de’it mak misaun militár, seguransa nian de’it, no farda ne’ebé ami hatais ne’e ruin no raan nia folin, ami tenke respeita, ami tenke serví loos de’it ba estadu, la serví ba see de’it,” dehan nia.

Koronel ne’e hatutan, tuir orientasaun no lei ne’ebé SNI iha, SNI tutela ba Primeiru Ministru, la’os tutela ba partidu ka grupu no organizasaun.

Tan ne’e, nia afirma, nia sente duvida bainhira mosu fali lia-fuan partidariza SNI.

“Ha’u duvida uitoan, keta atuasaun ruma mak sala karik, ha’u ladun hatene, mais ha’u mai iha ne’e, Oitavo Governo mak fó konfiansa ba ha’u mai iha ne’e.”

Durante asume kargu nu’udar DJ SNI, Koronel Amico dehan, SNI konsege halo intervensaun ba kazu droga ne'ebé envolve husi líder partidu istoriku nia familia, kazu osan husi Partidu Khunto ne’ebé la'o la tuir regra no kazu balun iha Ministériu Obras Públika ne’ebé ikus mai hasai membru PLP balun iha ministériu refere.

“Ha’u mai iha ne’e, primeiru, ha’u kaer droga ne’ebé mak ita bele koalia, lider balu ne’ebé mak kaer partidu istóriku sira-nia família mak asegura, ha’u atua. Loloos ne’e, se ha’u partidariza, ha’u labele ba book ida ne’e, tanba sira mak fó konfiansa bá ha’u.”

“Segundu, ha’u ba trava osan ne’ebé mak Khunto nian, ne’ebé mak la’o la tuir regra ne’ebé mak estabelese iha nasaun ida, trava iha aeroportu. Maibé ha’u la hatene, ha’u partidariza saida.”

“Terseiru, iha kestaun balu, iha Obras Públiku nian, lideransa balun iha obras públiku hasai sira husi sira-nia kna’ar, tanba partidu PLP nian, ne’ebé mak hasai sira husik hela sira-nia kna’ar hanesan administrasaun iha ne’ebá. Ha’u halo buat sira ne’e. Ka tanba ha’u partidariza partidu PD ho CNRT, sira na’in rua nia ema ha’u la book ne’e mak ha’u sala karik, ha’u la hatene,” dehan nia.

Amico hatete tan, ninia sala tanba karik mós nia koordena ho Polisia Sientifiku Investigasaun Kriminal hodi halo buska no aprensaun ba kilat illegal iha ema balun nia rezidensia, no sala seluk mós mak karik tanba durante ne’e SNI subar iha siziliu nia kotuk.

“Buat sira ne’e karik, ha’u ladun hatene. Ne’ebé, ami halo buat ida bokur tiha ona, ami la’o hanesan manu-rade, mais ami seidauk sente dehan katak ami bokur ona, ne’ebé ha’u mai book sira ne’e mak keta ha’u-nia sala karik, maibé tuir lei ne’e mandatu ne’e tenke tinan haat, mais ha’u hanesan expulsu.”

“Ha’u simu ezonerasaun, hanesan militár, hanesan Veteranu, hanesan mós Diretór SNI, hanesan sidadaun, ha’u simu desizaun saida de’it, Governu kuandu fó mai, estadu kuandu fó mai, ha’u simu,” dehan nia.