Portugal manan osan-mean tenis kampu, Femenina, maskolino no pares mistu bainhira halakon nia adversáriu iha final jogu.
Iha jogu pares mistu ne'e, Portugál sai primeiru lugar no hetan medalla ouro, ho atleta Beatriz Angélico no Lourenço Correia. Segundu lugar Moçambique ho atleta Leticia Zandamela no Amine Rosa no terseiru lugar okupa husi Portugál no Timor-Leste, ne'ebé hetan medalla Bronze, atleta Portugál, Sofia F. Silva no António Rodrigues, no atleta Timor-Leste Graciabeth Carvalho no Efran Sarmento.
Jogu Singular masculino okupa primeiru lugar husi Portugál ho atleta António Rodrigues, hetan medalla Ouru. Segundu lugar Moçambique, Atleta Amine Rosa ho medalla prata. Terseiru lugar mós husi Portugál no Timor-Leste ne'ebé hetan medalla Bronze, atleta Portugál Lourenço Correia, Atleta Timor-Leste, Efran Sarmento.
Jogu singular femenina, okupa primeiru lugar husi Portugál, ho atleta Beatriz Angélico no hetan medalla ouru, segundu lugar Moçambique, atleta Letícia Zandamela ho medalha prata no terseiru lugar Angola ho Portugál, ne'ebé hetan medalla bronze, atleta Angola, Filomena Gonçalves, Portugal Sofia F. Silva.
Reprezenta atleta feto Portugál, Beatriz Angélico, sente orgullu tanba kuaze manán nain iha jogu ne'e mesak husi Portugál de'it.
“Ha'u kontente no orgullu tebes, tanba tenis kampu ne'e ami mak manán hotu iha primeiru no segundu lugar", dehan nia hafoin remata jogu iha Tenis Kampu UNTL, Kinta (24/07).
Nia dehan, ho medalla sira ne'ebé iha nia sei nafatin esforsu atu lori nia nasaun ba oin. Tanba durante nia jogu tenis ne'e sempre okupa terseiru lugar sira-ne'e, maibé mai joga iha Timor-Leste maioria Portugál juara 1 no 2.
“Ha'u iha esperansa katak ho manán hirak-ne'e ami sei kontinua luta ba oin no nafatin lori ami-nia nasaun ba oin,” Dehan nia.
Reprezenta atleta mane Portugál, António Rodrigues, sente haksolok tebes hafoin hetan primeiru lugar iha torneiu internasionál ténis nian neebé halao iha ámbitu CPLP nian.
“Ida-ne'e lori nasaun nia naran mak mai joga la'ós klube, entaun ha'u sente orgullu tebes ba medalla hirak ne'ebé ami oferese ba ami-nia nasaun,” Nia dehan.
Nia hatutan, ba oin sei nafatin esforsu atu ganha nafatin medalla iha oportunidade hotu ne'ebé iha.
Atleta Moçambique Leticia Zandamela, agradese ba oportunidade ida-ne'e, tanba nia mós bele reprezenta nia nasaun mai partisipa iha jogu CPLP, no hetan medalla hodi hamorin nia nasaun nia naran.
“Ida-ne'e lori nasaun nia naran, tanba ne'e bainhira manán sente kontente, no nafatin esforsu atu ganha medalla osan mean barak liután ba nia nasaun,” Dehan nia.
Atleta Timor-Leste, Efran Sarmento hatete, maske nia esforsu atu manán medalla ouru, maibé la konsege tanba ema joga di'ak hotu. Nia parte sente triste, maibé ida-ne'e mak rezultadu jogu.
“Ha'u sente triste no esforsu maibé ida-ne'e mak rezultadu jogu, maske nune'e ha'u sei nafatin esforsu iha futuru atu bele sai manán nain iha oportunidade sira tuir mai tan,” tenik.
Enkuantu, entrega medalla ba atleta sira-ne'e husi, Ministru Adminsitrasaun Estatal (MAE) Sekretariu Estadu Arte Kultura (SEAK), Embaixador Moçambique, Empreza bee Leste no Prezidente Federasaun Tenis Timor Leste.