Embaixadór foun ne'e hatete, Timor-Leste nu'udar Estadu membru Komunidade Ko'alia Lian Portugés (CPLP), tanba ne'e presiza tebes atu mellora lian Portugés husi baze.
"Aspetu xave ida ba ami, iha tinan barak nia laran no projetu ne'ebé susesu tebes maka kestaun edukasaun nian. Ami kontinua serbisu iha área edukasaun nian, formasaun profesór sira nian, prezensa iha eskola no biblioteka sira, dala ida tan kona-ba kestaun lian portugés nian, formasaun ba estudante sira, maibé mós importante tebes forma profesór sira. Iha profesór portugés sira iha ne’e ne’ebé bele forma profesór timoroan sira nune’e, edukasaun iha ninia dimensaun oioin", dehan embaixadór Duarte, iha Palásiu Governu, horisehik.
Embaixadór foun ne’e konsidera CPLP liga ho kestaun lian komún ida no tasi, ne’ebé sai mós elementu komún fundamentál. Ida-ne'e esensiál bá nasaun membru CPLP hotu.
Nia dehan, iha Timór Governu tau importánsia bo’ot bá kestaun sira iha Ekonomia Azúl ne'ebé panfletu barak mak monta iha sidade laran tomak, hodi reflete prosesu konsultasaun públika kona-bá estratejia Ekonomia Azúl nian.
"Tanba ne’e ami diskuti kona-bá oportunidade, difikuldade no dezafiu sira hosi ekonomia sira ne'ebé dezenvolve hela, no oinsá bele servisu hamutuk iha área ida-ne'e," tenik Duarte.
Aléinde ne'e, nia dehan, aspetu seluk ne'ebé Portugál kontinua dezenvolve mak setór direitu no justisa, tanba Timor-Leste iha plataforma fundamentu komún kona-ba estrutura jurídika.
"Tanba ne’e, se ida ne’e mak Timor nia hakarak, naturalmente, ami mós iha vontade atu kontinua servisu iha área lei, justisa, no lejizlasaun, iha saida de’it mak iha ami-nia alkanse no hatán ba Timor-Leste nia nesesidade iha diálogu bilaterál ho Portugál," nia dehan.
Enkuantu Embaixadór Duarte Alves nu'udár diplomata distintu ida ho karreira ida ne'ebé dura liu dékada rua dezde tama iha Ministériu Negósiu Estranjeiru Portugál nian iha tinan 1999.
Ninia esperiénsia diplomátika internasionál ne'ebé estensivu inklui destakamentu sira iha embaixada portugés nian iha Luanda, Bruxelas, no Tokyo, no mós nu'udár Adjuntu Reprezentante Permanente iha OECD Paris.
Iha Lisboa, Embaixadór Alves asumi ona pozisaun assesoria superiór sira ne'ebé signifikativu iha Governu nia laran.
Molok hetan nomeasaun mai Timor-Leste, Embaixadór Alves hala’o knaar nu’udár Konsul Jerál Portugal nian iha Manchester, dezde Setembru 2021. Embaixadór Duarte Alves fluente iha lian Portugés, Inglés, Fransés, no Italianu.
Relasaun bilaterál entre Timor-Leste no Portugál nu’udár parseria ida ne’ebé profunda no multifasetadu, ne’ebé metin iha istória, lian no kultura ne’ebé fahe malu.
Ligasaun ida-ne'e reforsa liu-hosi akordu bilaterál 77 no programa kooperasaun estratéjika ida-ne'ebé ativu dezde 2011.
Portugál nia apoiu indispensável iha seitór krítiku sira hanesan edukasaun, justisa no defeza, kombina ho diálogu polítiku nível altu ne’ebé konsistente, halo parseiru internasionál Timor-Leste nian ida-ne'ebé vitál no durável-liu.
