Prezidente Komisaun C, Deputada Cedelizia Faria dos Santos hatete, haree ba asuntu Finansas sente preokupa ho situasaun ne’e akontese halo funsionariu sira barak sai vitima, maibé iha dalan hela atu halo pagamentu iha tinan ne’e.
“Ha’u mós preokupa ho situasaun ne’ebé akontese, ita haree iha Ministériu lubuk ida mak sira nia Funsionáriu la simu désimu terseiru, la’os de’it funsionáriu kontratadu, ha’u haree mós iha Funsionáriu Permanente sira ne’ebé la simu sira nia osan désimu terseiru,” Dehan nia, iha Parlamentu Nasionál, Tersa (06/01).
Nia dehan, halo orsamentu ba saláriu vensimentu, konta tiha hotu kedas ona ho saláriu ba 12-messes no tenke inklui iha laran saláriu désimu terseiru nian iha 2025 iha Ministériu barak ke sofre ba kortes iha sira nia saláriu no vensimentu rasik durante ne’e audiénsia hala’o komisaun la rona informasaun husi Governu katak sei fó impaktu ba orsamentu désimu terseiru.
“Normalmente bainhira ita halo orsamentu, ita halo orsamentu ba saláriu vensimentu, ita konta tiha hotu kedas ona ho saláriu ba 12-messes no tenke inklui iha laran saláriu désimu terseiru nian. Agora iha tinan 2025, iha mós Ministériu barak ke sofre ba kortes iha sira nia saláriu no vensimentu rasik. Maibé ha’u hanoin durante ami nia audiénsia ne’ebé mak ami hala’o, ami la rona informasaun husi sira katak ne’e sei fó impaktu ba orsamentu iha désimu terseiru nian ne’e,” Dehan nia.
Nia fundamenta, agora dekretu ne’e Governu halo fó ba Prezidente ne’e hateten katak désimu terseiru tenke halo Ppgamentu hotu iha fulan dezembru nia laran, signifika ema hotu tenke simu ninia direitu ba saláriu désimu terseiru iha dezembru.
“Iha ezekusaun ida, bainhira ita hatama ona komitmentu ba 2025 sei bele permite halo pagamentu to’o loron 15 de Janeiru 2026. Maibé bainhira sira taka konta iha loron 31 Dezembru ne’e nia tenke tama tiha ona iha rúbrika ida komitmentu. Ne’ebé la’ós dehan katak to’o ona iha 2026, ita labele ona halo pagamentu ha’u hanoin ne’e laloos. Se karik sira hatene katak iha duni problema ida ne’e maka sira hatama osan para halo retroativu iha 2026 nian ne’e mós lei sei fó dalan ba halo pagamentu.”
“Preokupasaun boot ne’ebé ami simu mak BNCTL nian, ami simu informasaun ema barak nia saláriu la tama, balun koa barak, entaun ami iha tempu badak ida ne’e ami sei halo audiénsia no pedidu ba bolu Ministériu Finansas ho BNCTL atu mai urjente tanbasa mak mosu bu’at sira ne’e. Kada-vez ita simu informasaun katak Ministériu Finansas haruka tiha ona ba, depois BNCTL mós dehan seidauk transfere ba no kada Ministériu mós dehan tranfere ona ba maibé problema iha Ministériu Finansas no BNCTL,” Nia afirma.
Deputada ne’e afirma, funsionariu sira hotu iha direitu tanba sira halao serbisu ona durante tinan tomak iha mós direitu ba simu salariu, tanba ne’e sei bolu MF ho BNCTL mai para halo klarifikasaun loloos ba asuntu ne’e.
“Ami komisaun C preokupa, iha tempu badak ha’u hanoin, ami sei bolu BNCTL ho Ministériu Finansas atu mai rona direta tanbasá mak mosu kestaun sira ne’e. Ami espera katak ho audiénsia ida ne’e ita bele rezolve problema ba OJE 2026 labele akontese tan. Tanba ne’e ema nia direitu, nia servisu tiha ona 12-messes nia iha direitu duni ba simu ninia désimu terseiru tanba nne’e lei mak haruka,” Tenik nia.
