“Rezultadu votasaun a-favor 57, konta zero no abstensaun zero, rezolusaun Parlamentu Nasional Númeru 65/2025 pasa ho unaminidade,”dehan Vise Prezidente Parlamentu Nasional, Alexandrinho Afonso Nunes, iha sala Plenaria Tersa (16/09/25).
Vise Bankada CNRT, Deputadu Partocino Fernandes hatete, prosedimentu husi deputadu Joaquim nian, ne’e prosedementu normal, maibé prosedementu normal sira hotu ne’ebé la’o, ninia pontu kombinasaun ne’e, desizaun iha plenaria.
“Tanba ne’e mak ohin ami mai aprezenta hodi haree mós situasaun atu kontinua ami nia pozisaun politika ne’ebé horseik (15/09/25), ami fó sai ba públiku no ohin ami hakarak atu konsistensia no formaliza pozisaun ida ne’e liu husi rezolusaun. Tanba ne’e maka, ami ohin lori mai aprezenta ba meza atu delibera tanba plenaria nia desizaun maka vinkula ba prosedementu sira ne’e hotu,”dehan Vise Prezidente Bankada CNRT, Deputadu Patrocino.
Entretantu, Deputadu Bankada FRETILIN Antoninho Bianco hatete, ho aspirasaun ne’ebé iha, lapresiza atu dada kleur maibé situasaun emerjensia tenke rezolve ho emerjensia.
“Tanba ne’e maka ha’u hatene, ajenda ohin laiha maibé Bankada FRETILIN mós pronunsia ona katak atu aprezenta projetu no rezolusaun ida ne’e, nune’e tempu ona ita iha konsensia ida atu bele hasai rezolusaun,”dehan Depuadu Bianco.
Nia haktuir, iha situasaun ida hanesan ne’e, deputadu sira tenke konsensu no fiar malu duni, hodi solusiona problema ne’ebé iha.
Enkuantu, Xefe Bankada PLP, Maria Angelina Sarmento hatete, ho ezizensia estudante sira nian, deputadu sira iha Parlamentu Nasional avansa ona ho rezolusaun ba kansela akizasaun viaturas 65 ne’e, maibé labele haluha mós katak ezizensia seluk husi estudante universitariu sira kona ba altera lei pensaun vitalisia, altera lei manifestasaun no mós alokasaun OJE ba setór produtivu sira ne’ebé kiik.
“Deputadu sira nia deklarasaun ohin, embora tarde ona, mais laiha buat ida, duke ita la halo liu, ita avansa ba rezolusaun ida ne’e, mais buat ida ohin deputadu Duarte Nunes hato’o hela tpc seluk ne’ebé ita presiza hanoin mós, ne’ebé sai nuudar akordu husi enkontru ida ho estudante sira horseik (15/09), maka altera mós lei pensaun vitalisia, altera lei manifestasaun. Ida ne’e mós tenke sai traballu de casa ba ita, ita avansa ona ho rezolusaun ida ne’e, mais buat seluk ita labele husik hela, tanba kontinuasaun husi asaun sira horseik mak ezizensia ida resolve ona no ita tenke resolve tan ezizensia seluk,”tenik Deputada Maria Angelina Sarmentu.
